Rakhe ka KSU ia ka jingdap 48 snem ka jylla da kaba tah poster ban Dawa ILP

Shillong, Kyllalyngkot 21: Ka KSU mynta ka sngi kum shi bynta ban rakhe ia ka lyngkhuh snem kaba 48 jong ka jylla ka la pynlong ia ka jingsam stickers sha ki kali bad ka jingtah posters ha kylleng ka Bri U Hynniewtrep. Kine ki posters ki dei kiba pynkynmaw ia ka jingpyrshah ia ka CAA bad ka jingdawa ia ka ILP bad ruh ban pyntreikam noh ia ka MRSSA.

Wat la ka jylla ka la kot haduh 48 snem hynrei haduh mynta ki sorkar kiba la synshar kim pat lah ban teh lakam ia ka jingrung kyrthep ki bar jylla bad ki mynder bad ha kajuh ka por ban weng noh ia ki mynder kiba la rung ha ka Bri u Hynniewtrep naduh u 1971.

Ka jingwan jong ka CAA ka pynkynmaw biang ia ka umsaw ba wan tap ia ka Jaidbynriew ha ka dur jong ki Bangladeshi ha u snem 1971 bad ter ter bad kumjuh ruh ka jingwan buhai shnong ki Jaidbynriew na Nepal ha kito ki snem. Ha shwa ban ioh ia ka jylla ba puta ha u 1972, ka ILP ka treikam pura ha ka United Khasi Jaintia Hills District hapoh Assam. Phewse hadien ba la ioh ia ka jylla riewlum ka ILP ka la jah noh bad wat haba la mih ki jingdawa ba pan ILP naduh u 1987 ter ter ym shym la don kawei ka sorkar ruh kaba lah ban pynurlong.

Ha ka jingshisha ka seng ka sngewdei ba kum shi bynta haba ioh ka jylla lajong la dei ban shna bun jait ki ain ban pyrkhing ia ka jingwan rung khlem kyndon ki briew kiba nabar kaba la ktah lut nadong shadong ia ki Jaidbynriew riewlum kiba rit paid naduh ka jinglong trai ha ka khyndew ka shyiap, ka shynshar khadar ha shnong ha thaw bad ha dorbar thawain, ka shongkha khleh, ka kamai kajih bad kumta ter ter.

Ka seng ha kum kane ka sngi ka kwah ban pynsngew sha kane ka sorkar kaba mynta ban pynurlong noh ia ki jingthrang ki paidbah trai ri ka jylla ha baroh ki liang, naduh ka jingteh lakam ia ki mynder, ki jaka pule kiba biang, ka jingioh kam iohjam, ka koit ka khiah, ki surok rong bad kumta ter ter. Ka seng ka sngewdei ban ong ba khlem kitei haneng ka jingioh ia ka jylla ba pura ha u snem 1972 hadien ba ioh ia ka autonomous state ha u 1970 kan ym ai jingtngen ba pura ia u paidbah ka jylla.

Ka KSU ka pynrem ia jingleh ki pulit ha kaba ki la tar ia ki posters ba la tah ha ki kynroh ha Laitumkhrah, Laban bad 9 lad. Kane ka long kumba pyni ba ka sorkar kam pyrshah ia ka CAA bad kam kwah ILP bad MRSSA.

Kane ka long ruh ka sien kaba ar haba kum kane kan jia, kaba nyngkong ka long haba ki pulit ki la weng ia ki lama iong ba la teh da ka seng kum shi bynta ban pyrshah ia ka jingshah thombor ki samla pule ka JNU. Khatduh khatwai ka seng ka pynpaw ba kam riej ia kum kine ki kam pyntieng kohtympan, pynban kan dang pynjur shuh shuh ki jingia khih ha ki sngi ban wan.

 

What Next?

Recent Articles

Leave a Reply

Submit Comment

*