Shillong, Naitung 13: Na ka daw jong ka jingjur palat jong u slap ha kine ki saw sngi lynter ka surok National Highway kaba leit na Shillong sha Tura kala twa ha ka jaka kaba la tip kum ka Nongshram ha West Khasi Hills District shuwa ban poi sha East Garo Hills District.
U bah Gigur Myrthong MLA jong ka Mawtyngkut haba kren ha u SP News Agency u la iathuh ba katei ka jaka kaba twa ka surok mynta ka sngi ka dei ha Nongshram bad na ka liang jong u Engineer jong ka PWD u la leit sha katei ka jaka ban peit ia kane ka jingtwa ka surok.
Ka jingtwa jong kane ka surok kala pyntup ia ka leit ka wan jong ki briew hapdeng ka Ri lum Khasi bad rulum Garo namar ha kane ka por jan baroh ki briew kiba ialeit ia wan ki iaid lyngba kane ka surok ban kiar na ka jingkiew sha ka jylla Assam khamtam ha kane ka por ba don kane ka COVID-19.
Ka jingtwa kane ka surok ha katei ka jaka ka long ba kala shuang bad kad na pdeng surok bad la iathuh ba kane kam dei ka sien kaba nyngkong hynrei kala juh jia teng kum kane ka jingtwa kane ka surok ha katei ka jaka bad la ong ba ka daw ka lah ban long namar ba ka shong um.
