Sdang ka shad Suk Mynsiem ka Seng Khasi Mawlai ha madan shad thymmai, Mawroh

Shillong, Ïaiong  04: Ka Seng Khasi Mawlai, mynta ka sngi ka la ïoh ba kan sdang ïa ka Shad Suk Mynsiem kaba ar sngi ka jong ka, ha kaba ka shad noh kjat jong kane ka tnat Seng Khasi, la ïoh ban pynlong ha Lympung Shad jong ka Seng ka ba thymmai, ba don ha Mawlai Mawroh.

Ïa kane ka Lympung ka Seng Khasi Mawlai ka la ïoh ïa ka ha u snem 2014 na U Syiem ka Hima Mylliem, kaba ha shwa ïa kane, ïa ka shad ba shi sien shi snem,  la juh pynlong ïa ka kum hapoh Madan Heh Stadium, Mawlai, Madan Shnong Mawlai Mawroh bad kumjuh hapoh ka shnong Umsaw.

Kumban shu pynkynmmaw ba ïa ka Shad Suk Mynsiem ka Seng Khasi Mawlai, la sdang nyngkong ïa ka ha u snem 1994, kaba long ha shuwa jong ka Shad Suk Mynsiem jong ka Seng Khasi Kmie, kaba long kum ka dak ban ïalap bad wer ïa ne kyrsiew  ïa la ki parakur parakha ka bri u Hynñiewtrep Hynñiewskum.

Kane ka jingkyrsiew ka long  ba la por ka  samoi jong ka shad ka kmen, ka la wan poi, ha kaba u khun bynriew un ïoh ban mih  lympung ryngkat ka riam ka beit ka ksiar ka rupa, ban shad ha lympung shad ban ainguh ïa la U Blei Nongbuh Nongthaw.

Kongsan ba la plie ïa kane ka madan shad ba thymmai ka Seng Khasi Mawlai dei u Acting Syiem ka Hima Mylliem, Pa’iem Ainam Manik Syiem, katba  u Rgh Don Kupar Dkhar, President Seng Khasi Kmie, ula pynher ïa ka lama jong ka seng. Katba ia ka nguh ka dem Blei, la pyndep ïa ka da u Rangbah  Skor Jala, Chairman ka Komiti ka jong u Tymmen U San, Seng Khasi Kmie.

Nalor katta ruh, la ïoh ruh ïa ka jingkren na u President bd General Secretary ka Seng Khasi Mawlai u Rgh Dipshon L. Nongbri bad u Phira Sing Warnongbri bad la pynïaid ïa ka jingïalang plie ïa ka Lympung Shad da u bah Paia  B. Synrem,  Chairman,  Cultural Committee ka Seng Khasi Mawlai.

Ha ka sngi shad ba nyngkong ki nongshad kynthei bd shynrang kiba la wan ban ïashim bynta ki long 86 ngut ki nongshad.  Kane ka shad ba-ar sngi kan kut noh lashai ka sngi ka 4 tarik Ïaiong bad ka seng ka wer ïa ki khun samla kynthei bad shynrang ban ïashim bynta shitrhem sha kane ka shad ban ainguh ïa la U Blei Trai Kynrad.

What Next?

Recent Articles

Leave a Reply

Submit Comment

*