Shillong, Naitung 22: “To long kiba isynei”ka long mat phang pdeng jong ka jubili Rupa ka Seng Kynthei ka Balang Shnong ia kaba la sot na ka Kospel U Lukas 6. 36. Halor katei ka nongrim ba ka Seng Longkmie ka la pyntrei kam ia ka jingdawa jong ka snem Jubili Rupa ba 25 tylli ki snem kaba la neh shi snem kynthih ia kaba la pynkut mynta ka sngi ha ka Iing mane Mawiong ba la ai nam “Ka Maria Ka Kmie jong U Rosary Bakhuid.
Ia kane ia ka jubili rupa jong ka Seng Kynthei Mawiong la plie myn shem snem ka 23 tarik u bnai Naitung 2017 la pynkut noh mynta u snem da ka Nguh ka Dem Blei ba la pynmynta da u Archbishop Dominic Jala kum kongsan ha ka jingiasynran lang u Sohblei Marius Thongni Parish Priest ka Mawlai, u Sohblei Phrem Sing Rapsang, u Sohblei Jameris Shylla Assistant Parish Priest ka St. Joseph Mawkhar u Sohblei Paul Orphindro Lyngkot Provincial ka Shillong Province Salesian bad kiwei kiwei.
Ka seng kala noh syniang sha ki long iing ki bym lah ban kyrda ia ka longiing sem. Ka kam isynei kaba seng ka la noh syniang ka dei ba ki la dep pynshna ia ka iing jong ka Kong Airis Syiem Shangoi kaba don ha Mawiong Rim Lumpyllon, kaba mynshuwa ka iing ka dei ka iingtrep kaba rit ba la shu tap bad ker da ka plastic ia kaba la ai ti ha ki trai iing myn ha ka 21 tarik u Kylla Lyngkot 2018.
Ka seng ka la noh syniang ia ka iing ka kong Jessica Majaw kaba la ngat ha ka jingpluh ding kaba don ha Lumdiengsier Mawiong shuh shuh ka Seng ka noh syniang ha kiba ka Seng Kynthei Mawiong ha baroh shisnem kaba la rakhe kyrpang da ki kam isynei ia ki para mynsiem kiba donkam ia ka jingiarap bun ki jingdonkam jong ka Shnong bad ka Balang haba don ba wan pynsngew sha ki.
Haba iaphai sha ka jingpynkut ia ka Jubili kaba long mynta u Archbishop Dominic Jala kum u kongsan u la pynsngew ba ka kum seng kaba la kynjoh ia ka jingiaid lynti kaba 25 tylli ki snem kim dei ban shu hun ba la lah leh ki kam hynrei ka dei tang ka jingsdang ban lam lynti khnang kiba nadien jong ki kin bud. U Archbishop ba kum ki longkmie ki long ki nongkit ki nongbah ia ka iing ka sem ki dei ban im ban leh da ki kam ym da ka ktien namar kum ka ktien phira jong ka jubili kaba ki la buh ka long ban long kiba isynei da ki kam bad ha ka jinglong kaba jai jai.
Haba pynkynmaw shuh shuh ia ki longdien jong ka seng kiba long ki mait shrah ia ka seng ki la jaw syep syar namar ban pynpoi pynroi ban sumar ia ka lyngkha kaba la bet ha ki 25 tyli ki snem da ki jingeh. Ka kam kaba ki longkmie ki la leh la dei ban ai jingiaroh ha ka pyrthei haba iakren ia ka jingim mynsiem bad ki kam mynsiem ym dei ban put turoi ioh duh noh ia ka bneng.
Ha ka snem jubili kaba kyrpang u Archbishop u la ai Sakrament Jingpynskhem ia ki 120 ngut ki khun samla ka balang kaba kynthup ia rangbah bad tymmen. Na ka liang ka seng Longkmie kaba la pynkut ia ka jubili ka la pynkup burom ia ki Nongsharai balang kiba kynthup ia u Archbishop Dominic Jala ki Nongtrei Balang bad ki nongkitkam Barim ka Seng Longkmie.
Ha ka por Nohphai sngi la pynlong ia ka jinglehburom bad lehkmen da ki kolshor bapher bad ka jingai khusnam sha ki nongjop bapher bapher ha ka jingiakop lehkai kaba kynthup ia ka Phutbol ka jinbgkyntip Baibyl, bad ka Jingiakop rwai na ka ktien U Blei. La pynkut ia kane ka sngi da ka pynhiar ia ka lama jong ka Jubili da u Sohblei Varikkaseril SDB bad ka jingrwai ia ka Anthem jong ka Seng.