Shillong, Risaw 03: U Bah Aristotle C. Rymbai President MSSASA jong ka Central Body u la ong ba ka seng ka dawa na ka sorkar ba ka dei ban pynlait noh ia ka arrears jong ki nonghikai shuwa ka 20 tarik mynta u bnai lem kumta ka seng kam banse ban pynlong da ka jingiakhih.
Ha ka kyrwoh kaba la phah mynta ka sngi la ong ba ka ia bhah kaba ar kaba dei ia ka arrears jong u snem 2016-2017 ka sorkar pdeng lyngba ka tnad MHRD kala dep ban phah ia ka pisa sha ka sorkar jylla ha u bnai Rymphang 2017 hynrei mynta la phra bnai ka sorkar jylla kam pat pynlait ia kane ka pisa. Ka arrears jong ki nonghikai ka dei na duh u Naitung 2016. Ka jingeh ka long ba ka sorkar pdeng kam pat phah ia ka pisa sha ka sorkar jylla.
Ki nonghikai SSA ha ka Lower Primary ki don 5766 ngut bad ha ki Upper Primary ki don 6715 ngut kiba hap hapoh jogn ka skhim Sarva Shiksha Abhiyan (SSA). Halor kane ka jingleh jong ka sorkar jylla na ka liang jong ki nonghikai kim sngewtynnad ia kane ka jingleh jong ka sorkar MUA-II ha kaba kala pynslem kai ban siew ia ka arrears phra bnai bad ia ka tulop ar bnai.
Na ka liang jong ki nongialam ka seng Meghalaya SSA Schools Association (MSSASA) ka dawa na ka sorkar ba ka dei ban pynlait noh ia ka hok kaba dei ka jong ki, kila ia kynduh ia u bah W.R. Lyngdoh Secretary Education Department jong ka sorkar jylla ia u Ambrose Ch. Marak State Project Director (SPD) SSA,SEMAM.
Na ka liang jong ki nonghikai kin kynnoh tang ia ka sorkar jylla hynrei wat ia ka pdeng ruh ha ba ia dei bad kane ka kam. Na ka liang jong ki nonghikai kila dawa ia ka sorkar ba ka dei ban pynlait noh ia ka arrears shuwa ka 20 tarik mynta u bnai ban lait na ki jingiakhih la ong u Bah Aristotle Rymbai.
