Shillong, Jylliew 05: Mynta ka sngi ka pyrthei baroh kawei kala rakhe ia ka sngi pynneh mariang bad kum juh ka jylla Meghalaya kala shim khia ia kane ka sngi ha kaba u myntri rangbah ka jylla u Conrad K Sangma u la ia shim bynta lang ha ka jingthung dieng ha ka shnong Langkyrdem kaba hap hapoh jong ka Pynursla Civil Sb Division.
Na ka jingkren jong u myntri rangbah mynta ka sngi, ka long ba ha kane ka sngi la thung haduh 1.5 million tylli ki tynrai dieng ha ka jylla baroh kawei. Kane long ka jingthungdieng kaba heh tam hapoh jong ka jylla ha kum kane ka sngi pynneh mariang.
Na ki khubor kiba la wan na kylleng ki bynta jong ka jylla kane ka jingrakhe ia kane ka sngi pynneh mariang kam dei tang na ka liang jong ka sorkar, hynrei wat ki riew shimet bad ki jaka trei kam jong ki riewshimet ruh kila rakhe ia kane ka sngi da kaba thung dieng.
Kumba ka long mynta ka jingkhluid ha ka pyrthei kala dang kiew bad wat ha kane ka Ri India ruh la iohi ba kila don ki jylla kiba ka jingkhluid kala kot sha ka 50 degree , ia kane la ong da nongai buid jong u myntri rangbah ka jylla u Dr DD Lapang ha ka jingialang ki ASHA mynta ka sngi ha Madan Student.
Ia kane ka sngi la rakhe ha baroh kawei ka jylla ha kaba la jan baroh ki myntri sorkar kila ia don bynta ha kane ka jingiathung dieng mynta ka sngi ha ki District bapher bapher jong ka jylla. Ka phang pdeng ka long ban pynneh pynsah ia ka mariang thung shibun ki dieng.
