Shillong, Risaw 25: U Chairman jong ka KHADC u Bah Manstudy Nongrem bad u Bah D Kharwanlang Deputy Chairman kila shim ia ka rai ba kin hiar shuki noh la shai ka sngi.
Haba kren ha ki lad pathai khubor, u Chairman jong ka KHADC u Bah Nongrem u la ong ba, ka party kala weng noh ia ka jingkyrshan ia ka EC jong ka PDF kaba la lam khmat da u Bah PN Syiem, kum ki dkhot jong ka seng Congress kim sngew dei shuh ban don bat kam hapoh jong ka KHADC.
Katkum ka AD Rule jong ka KHADC, haba u Chairman bad u Deputy Chairman ki hiar shuki ha ka juh ka sngi haba ka iing kam don ha ka jingiashong dorbar ki hap ban leit ai ia ka shithi ienoh kam sha u Secretary jong ka Legislative da kaba address sha u Lat jong ka jylla.
Haba kum kane ka khep kan poi, u Lat jong kajylla u hap ban thung ia uno uno u MDC napdeng ki MDC ia u Pro-term Chairman jong ka iing dorbar ban pyniaid ia ka iing dorbar, bad u Lat ka jylla yn sa buh ia ka sngi ban shong dorbar ban jied ia u Chairman.
