Shillong, Lber 27: U Bah Pynshngianlang Syiem Chief Executive Member jong ka KHADC mynta ka sngi la wanrah ia ka mang tyngka na ka bynta jong u snem 2018-2018 hapoh ka iing dorbar kaba duna T.49560/-.
Katkum ka jingkren jong u CEM u la ong ba ka jingmih ha kane ka snem mang tyngka 2018-2019 kan long T.213,53,36,970/- bad ka jinglut kan long T.213,52,87,410/-.
Ha kane ka jingkren jong u CEM ia ka mang tyngka um shym la phiah katno ka pisa kan leit sha ki tnad trei kam kiba don hapoh jong ka KHADC, hynrei u la shu ai ka jingkheinlang baroh ia ka jingmih bad ia ka jinglut kaba ka KHADC kan pynlut ha kane ka snem mang tyngka.2018-2019.
Shuwa ba u CEM u ai ia ka jingkren na ka liang jong u nongialam ka liang pyrshah u la dawa na ka u Chairman jong ka iing dorbar ba dei ban pynsangeh noh shuwa ia ka iing dorbar shiphang namar ki tyndong jingpynsawa ha poh ka iing dorbar kim long kiba don ha ka liang synshar bad ia kaei kaba kren na ka liang synshar kim ioh sngewbha.
Hynrei na ka liang jong u Chairman jong ka iing dorbar u Bah LG Nongsiej u la behthah ia u CEM ban iaid sha khmat bad ka jingkren ka jong u ha kaba ia dei bad ka mang tyngka kaba dei na ka bynta jong u snem 2018-2019 hapoh jong ka KHADC.
