Shillong, Iaiong 28: U Chief secretary jong ka jylla Meghalaya u M S Rao mynta ka sngi u la pynmih ia ka jingpynbna ba ia ka tulop jong u bnai Iaiong ban siew ha u bnai Jymmang bad ia u bnai Jymmang ban siew ha u bnai Jylliew ba ia ka tulop jong u Myntri rangbah ka jylla, ki myntri bad ia ki IAS, IPS bad IFS yn bat 50% na ka bynta kitei ki ar bnai.
Ha kane ka jingpynmih hukum jong u Chief secretary mynta ka sngi u la ong ba hap ban leh ia kane namar ka don kane jingpang COVID-19 kaba la wan khlem poi pyrkhat bad na ka daw jong ka jingkhang kan ktah ia ka ioh ka kot ha ka Ri bad kum juh ha ka jylla hi baroh kawei.
Namar kane ka jinglong jingman kala don kam ban adkar ia ka jingpynlut pynsep khang ban kunai na ka bynta ban pynbiang ha kane ka jingialeh pyrshah ia kane ka jingpang COVID-19. Halor kane ka sorkar kala hap ban shim ia kine ki rai.
Ka sorkar kala shim ia ka rai ba yn bat 50% ka tulop jong u myntri rangbah ka jylla, ki myntri sorkar, ki IAS, IPS bad ki IFS ophisar bad ia kito kiba wan trei sha kane ka jylla shipor kiba dei ha katei ka kyrdan ia ka tulop jong ki ruh yn bat 50%.
Haba ia dei bad ki nongtrei kiba hap hapoh ka kyrdan group A, Group bad Group C ia ka tulop jong ki yn bat 35% kane kan long ha baroh ki tnad jong ka sorkar jylla. Kane ka jingbat ia ka tulop kan nym ktah ia ka tnad ka koit ka khiah bad ia ka tnad pulit, Home Guard bad Civil Defence kiba dei ha ka kyrdan group C.
Kane ka jingbat ia ka tulop 35% kiba don ha ka group A, Group B bad group C kan treikam ruh ha kito ki ophis bad ki skul kiba ioh ia ka jingiarap na ka sorkar lait noh ki nongtrei jong ki Municipal kiba hap ha kane ka kyrdan Group C.
Ha kane ka hukum kaba la pynmih mynta ka sngi na ka liang jong u Chief Secretary u la batai ba kan nym don ka jingbat ia ka tulop jong kito kiba trei ha ka kyrdan Group D bad kum juh ia ka pension.
