Shillong, Risaw 10: Ki nongtrei sngi jong ka MeECL hapoh jong ka lama jong ka seng MeECL Progressive Workers Union (MPWU) la shim ia ka rai ba kin pynlong ia ka jingiakhih da kaba deng lama iong ban dawa ia ki bor jong ka Corporation ban ithuh noh ia kine ba trei sngi, kiba la trei bun bun snem kum ki nongtrei jong ka MeECL.
U Bah Mantiphrang Lyngdoh Giri president jong ka MPWU ula iathuh ba kum ka seng kala thoh sha ki bor jong ka corporation ban iakren halor katei ka jingdawa ka jong ki , hynrei kam shym la don kata ka jingkhot kumba ki la buh por ha kaba kala kut mynta ka sngi. Na ka daw jong ka jingleh bym suidniew jong ki bor ba halor kim banse ban shim ia kane ka rai ban iakhih da kaba deng lama iong.
Na ka liang jong u president ula ong ba hapoh jong ka MeECL kiba trei sngi, ki don kiba la trei haduh 26 snem hynrei ym shym la ithuh ia ki kum ki nongtrei ba pura jong ka corporation. Na ka liang jong ka seng ki dawa ba ka corporation ka dei ban ithuh noh ia kiba trei sngi kiba la trei bun bun snem ban ai jingithuh kum ki nongtrei ba pura.
Kumba ka long mynta baroh ki nongtrei, kiba trei sngi hapoh ka corporation ha baroh kawei ka jylla ki don 14,00 ngut. Kaba kham sngewsih ka long ba hadien ka jingdawa jong ki ka corporation ka pynmih ia ka hukum ba baroh kiba trei sngi ki hap ban sign ia ka contract kaba kim sngewthuh bad kim tip ruh aiu la thoh ha kata ka contract, kum ka seng ka pynrem jur ia kane ka jingleh da ki bor ba halor.
