Shillong, Nailur 20: Ka Congress kaba don ha Liang Pyrshah mynta ka sngi ka 20 tarik u Nailur 2024 kala byrngem ban leit mudui sha ka Iingkashari Meghalaya high Court lada kam hun satia ia ka rai jong u Lamphang ka Iingdorbar Thaw Ain haba iadei bad ka mudui ba leit iasoh ki 3 ngut ki MLA ka Congress sha ka National People’s Party (NPP).
Ka Congress kala buh ia artylli ki jingmudui-kawei ia ki arngut ki MLA ba ka sospon-Bah Charles Marngar (MLA ka Mawhati) bad Bah Gabriel Wahlang (MLA ka Nongstoin) bad kawei pat ka long pyrshah ia u Dr Celestine Lyngdoh (MLA ka Umsning)-hadien ba kila leit iasoh sha ka NPP ha ka 19 tarik Nailar.
U bah Vincent Pala President ka Meghalaya Pradesh Congress Committee (MPCC) ha ka jingiakren bad ki nongthoh khubor u la ong ba ka mat ba kongsan hi ha ka mudui ka long ba ngi ieng beit ha ka para 2 1(a) jong ka 10th Schedule ka Riti Synshar ka Ri.
U la ongruh ba ngin mudui ha ka iingkashari u Lamphang. Ynda u Lamphang ula pynkut ia ka mukotduma bad ai ia ka rai lane ai kano kano ka jingpynshai, lada ngim sngew hun ia kata, ngin sa leit sha ki Iingkashari kata ka High Court.
Lada ngim hun ia ka hukum jong ka High Court, ngin leit sha ka Iingkashari Supreme Court. Kane ka kam kam dei ka kam kaba rit, kan leit sha ki Iingkashari kiba halor” ula ong haba bynrap, namar kata, ka Congress ka dang ap ia ka hukum ba pynmih da u Lamphang.
U Joint Secretary ka AICC ba khmih ia ka Meghalaya Adv Matthew Anthony ula buh jingkylli halor ka rai jong u Lamphang ban iasyllok bad u Advocate General hashuwa ban ai ia ka rai jong u halor kane ka kam.
