Shillong, Naitung 09: Khlem poi pyrkhat ba ka National Institute of Open Schooling (NIOS) kala pynkiew ia ka bai eksam jong ki nonghikai a ka T.300 sha ka T.370 tyngka na ka bynta kawei ka subject na ka bynta kito ki nonghikai kiba hap ban ia khun ia ka eksamin Diploma in Elementary Education (D.El.Ed).
Ka seng Meghalaya SSA Schools Association (MSSASA) Central Body u bah Aristotle C. Rymbai president u la ong ba ka jingeh ka long na ka bynta ka eksam kaban long ha u bnai Risaw bad Naiwieng 2017 bad ki nonghikai ki hap ban siew ia ka bai eksam jong ki da ka Demand Draft naduh ka 01st haduh ka 31st mynta u bnai.
La ong ba katkum ka jingpyntip jong ka NIOS hapoh ka notice board kaba don ha Directorate jong ka Educational Research bad Training, Shillong, la thoh shai kdar ba ka bai eksan kan long T. 300 shi subject, hynrei khlem da tip ia ka daw la pynkiew sha ka T. 370 kane ka kdew shai ia ka jingbym ia sngewthuh ha pdeng ki para baheh hapoh jong ka NIOS bad kane kala dei ka kam thok ia ki nonghikai jong kan jylla Meghalaya.
Kane ka jingle jong ka NOIS ka buh ia ki nonghikai ha ka jingeh kaba khraw namar ba kila don ki nonghikai kiba la dep ban thied ia ka demand draft kaba T.300 bad kane kan pynlut ksan ia ki nonghikai ha kaba mynta ki hap ban thied biang ia ka demand draft. Kane ka long ka jingleh rain kaba khraw ia ka NIOS, la ong u Bah Rymbai.
Kaba kongsan ka long ba kane ka jingle jong ka NIOS ka kren shai ba kim lah ban ai ka jinghikai ia ki nonghikai ha kaba ia dei bad ka D.El.Ed bad ka thong jong kane ka NIOS ka long ban buh ia ka thong ban kamai pisa khlem da pyrkhat ia ka jingeh jong ki nonghikai la ong u Bah Rymbai President ka MSSASA.
