Khliehriat, Kyllalyngkot, 21: Ka long kaei kaei kaba lyngngoh bad kaba bym lah ban pdiang ia ka jingpynshai jong u Dr Mukul Sangma, Chief Minister ka jylla kat kum ba la paw ha ki lad pathai khubor ba u Chief Minister ka Jylla Meghalaya, u dang tip dang mynta halor ka jingjngai na Wapung sha Khliehriat ba ka dei tang 10 Kms bad na Jowai sha Wapung tang 22 Kms bad dei namar kata ka daw ba sa pynkynriah ia ka Wapung C&RD Block sha Lumshong.
“Haba kumne, u Chief Minister jong u jah shaei naduh ka 2014 tad haduh u Kylla Lyngkot, mynta u snem, u sa tip ba pleng ka jingjngai kam iahap ban don ka C&RD Block ha Wapung bad la hap ban pynkynriah pat sha Lumshnong”, ong u Bah M H Dkhar, President, ka AJYWO Central Body.
“Lada u Chief Minister jong u don ia ka jingbah khlieh, hato um shym la peit bniah ia ka Inspection Report ba la la leh da ki Sahep Sorkar ka EJHD ha ka 7th Jymmang, 2014 bad ruh ia kaba la phah sha ka Sorkar Jylla da u DC ka East Jaintia Hills District kat kum ka Letter No. No.EJHD.Dev.57/2013/12, Dated: Khliehriat, 13th June, 2014? Haba ha katei ka report la kdew shai ia ia kiei kiei baroh bad ruh kubur ba ka jaka ka long kaba biang ban pynkynriah ia ka Khlierhiat C & RD Block sha ka Wapung C&RD Block?” la ong biang h Bah M H Dkhar.
Shuh shuh u Bah Dkhar u la ong ba lada u Chief Minister, u ong ba ka Wapung kam dei ka jaka ba biang ban buh ia ka C&RD Block, balei ka Sorkar ka pynbun kam ia ki ar DS-Wapungskur bad Wapungshnong ban wad jaka? Balei ba la pdiang ia ka jaka ba la tyrwa sha ka Sorkar da ka ki ar DS letter No. Letter No. DSWS/Genl.2014/03/23, Dated: Wapung Shnong, 30th May, 2014 bad Letter No. DBSW/Genl./2014/05/01, Dated: Wapungskur, 15th May, 2014? Balei ba la pynmih ia ka Notification No. CDD.129/2014/37, Dated: Shillong, the 18th November, 2016 kaba pynbna ba la pynkynriah ia ka Khliehriat C & RD Block Sha ka Wapung C&RD Block?
“Balei pat ba pdiang bad shimti ia katei ka jaka kat kum ka Deed of Gift, tarik 21st April, 2017? Balei ba la pynlut pisa haduh duna 1.5 Lakh tyngka ban plie ia u Maw Nongrim ha Wapungskur ha ka 22nd April, 2017 na ka bynta ban tei ia ka Ophis jong ka Wapung C&RD Block? Balei ba la ai Work Order No. No.WDB/ENG/MGNREGA/BNGRSK/W.o.Pt-I/2017-18/01, Dated: Wapung, the 27th June, 2017 ka ba la kot haduh T.25,00,000/- bad balei ba iasoi ia ka Soskular ha ka 5th July, 2018 bad ong ban pyndep ia katei ka jingtei tang hapoh 5 bnai?” buh jingkylli biang u Bah Dkhar
“Ngam shym poi pyrkhat ba ka Sorkar ba mynta hapoh ka jingialam jong u Dr. Mukul Sangma kum u Chief Minister, kan leh da kumne ia ki ar DS bapli kibala trei shitom 4 snem kynthih ban pynioh jaka ia ka Sorkar na ka bynta kata ka Wapung C&RD Block kaba neh tang 8 bnai. Lada ka sorkar ka leh kumne, hato u paidbah u lah hi ban shaniah ia ka Sorkar?,” bynrap biang u Bah Dkhar.
“Haba kumne ka jia ia ki ba pli ki nong Wapung bad ki Shnong ba marjan jong ki, bishar hi ma phi paidbah, mano ba ialam bakla ia ki paidbah? Mano ba ialeh kai politics bad ki paidbah ha ka kyrteng jong ka roi ka par kaba neh tang 8 bnai? Lada jia ba mih ka huri hura ha ka thaiñ, mano ba wanrah ia ka?
“Ka seng ka dawa na ka sorkar ba ka dei ban wanrah biang ia ka Wapung C&RD Block, sha ka jaka kaba la tei ia ia ka mynta bad ruh ban pynioh da ka C&RD Block kaba thymmai ia ka thaiñ Lumshnong. Ka thaiñ Lumshnong bad Umkiang ka la dei hok ban ioh la ka jong ka C& RD Clock na ka bynta ka roi ka par jong ka thaiñ. Ka sorkar ka dei ban iohi ba ia mynta ka EJHD ka donkam bha sa kawei ka C&RD Block ba thymmai hapoh jong ka District.” la pynkut u Bah M H Dkhar.
