Shillong, Jymmang 06: Ka Joint Action Committee(JAC) jong ki shiphew tylli ki shnong kiba don saw dong jong ka Jalyiah ryngkat ka seng Jaintia Student Movement (JSM) kila khot ia ka jingialang paidbah ha ka 11 tarik mynta u bnai ha Lad-Jyliah ha ka por 10 baje mynstep ban dawa na ka sorkar ba dei ban pynkynriah noh ia ka Abhi Coke Industry na katei ka jaka.
Na ka liang jong ki shiphew tylli ki shnong kiba don sawdong jong kane ka Abhi Coke Industry bad ka seng JSM, ka jingdawa jong ki ban pynkynriah noh ia kane ka karkhana na kane ka jaka ki la kynnoh ba ka tdem kaba mih na kane ka karkhana kala ktah ia ka koit ka khiah jong ki briew katei ka thain.
U Bah Joining Roy Dkhar Waheh Shnong jong ka shnong Khlieh Myntriang la ong ba ia kane ka jingialang paidbah la khot da ka JAC jong ki shiphew tylli ki shnong ha ka jingiatreilang bad ka seng JSM ban dawa na ka sorkar ba ka dei ban pynkynriah ia kane ka karkhana namar kala ktah shisha ia ki briew kiba don sawdong jong ka.
La iathuh ba ka jingpyrshang jong ki seng bhalang ban dawa na ka sorkar ban pynkynriah ia kane ka karkhana ka dei ka jingdawa kaba la slem hynrei kim shym la lah, ha kane ka kynti kaba mynta kum ki shong kiba don sawdong kane ka jaka kila shim khia ban dawa na ka sorkar ba dei ban pynkynriah ia kane ka jaka shna Coke.
