Jowai, Naitung, 01: Ka AJYWO Central Body ka bym shym la shong kli kti ha ka ban wat jingtip halor ka khaii-pateng bad ka trei bylla jong ki Non-Tribal hapoh u pud u sam jong ka JHADC la ki iaid ne em kat kum ki kyndon aiñ , ka seng, hadien ka la dep wad jingtip da ka RTI ia ka Trading License, mynta ka taiew, ka seng, ka la wad jingtip shuh shuh sa ia ka Employee’s Service License jong ki Non-Tribal ha Jaintia Hills. Ia kane ka RTI la ai da u Heatermon Ryngkhlem, u ba dei ruh u President, jong ka AJYWO-East Jaintia Zone.
Katkum ka kyrwoh ba la phah da u Reachingson Siangshai, Vice Presiden, AJYWO Central Body, u la ong “Ngim lah ban len ba ka jingjyllei ki ba nabar ki ba wan khaii pateng bad trei bylla ha Jaintia Hills ka la long kaba shyrkhei. Kat kum ka “Jaintia Hills Autonomous District (Trading by Non-Tribal) Rules-2015 ” Chapter II, Section 20, ki Non-Tribal kiba trei bylla ha Jaintia Hills, ki dei ban don ia ka Employee’s Service License. Ka seng ka kwah ban tip la ka JHADC ka pyntrei kam ne em ia katei ka aiñ bad katno ngut na kiba kum kita ki Non-Tribal kiba don ia kane ka “License”.
U ne u nogngialam jong ka AJYWO u la ong shuh shuh “Ngin wad jingtip shwa na baroh ki jnit ki jnat kiba donkam na ka JHADC bad lada ngi lap ba lada ka JHADC kam pyntrei ka ki aiñ kiba ka la dep thaw na ka bynta ki Non-Tribal ha Jaintia Hills bad ruh lada ki Non-Tribal kim shym la iaid kat kum ki kyndon aiñ, ngin sa hap ban leh ia kaba donkam”.
“Ngam tharai ba ki briew jong ngi lada ki leit leh business bad trei bylla ha kiwei pat ki jaka shabar na ka jylla, kin ioh ban leh katba ki mon mon hangta. Kin hap beit ban iaid thik-pa-thik lyngba ia shibun ki aiñ jong kiba kum kita ki jaka kiba ki deil eh business, trei bylla, bad shong sah. Te kiba na bar ruh kiba kiba wan leh business, trei bylla bad shong sah shane ki hap ban iaid kat kum ki kyndon aiñ” la bynrap biang u Bah Siangshai.
Ha kawei pat ka liang, ha u kyrwoh ba la pyllait da u Bah Heatermoon Ryngkhlem, President, AJYWO-East Jaintia Zone, u la ong “ Ka AJYWO ka la kut jingmut, ba ym tang ia ka Trading License, ESL, hynrei kan dang iai buddien ruh ia kiwei de ki aiñ ki ba ia dei bad ki jingteh kyndon ia ki Non-Tribal ki ba wan khaii-pateng, trei bylla bad wan shong wan sah hapoh Jaintia Hills, da kaba wat bniah naduh ki aiñ ka JHADC haduh ki aiñ jong ka Sorkar Jylla kiba la don lypa la ki trei kam pura ne em?”.
“Ngi artatien, ioh lehse, ka jingbym shim khia jong ka JHADC bad ka Sorkar Jylla ban pyntrei kam pura ia ki aiñ jong ki kiba la don lypa kiba ia dei bad ka wan khaii-pateng, trei bylla bad wan shong wan sah jong ki Non-Traibal ha Jaintia Hills, kane ym tang ba ka wanrah ia ka jingduh nong ia ka JHADC bad ka Sorkar Jylla hynrei ka buh ruh ia ki trai ri trai muluk ha ka jingma hadien ha bud”.
Namar kata, kum ka seng kaba peit ia ka bha ka miat jong ka Ri bad ka Jaibynriew Rit Paid lade, kan ym shong kli kti hynrei kan iaid shakhmat ban buddien ia kane ka phang kaba iadei bad ki Non-Tribal ki ba leh business, trei bylla bad shongsah ha Jaintia Hills.” Pynkut u Bah Heatermoon Ryngkhlem.
