Shillong, Naiwieng 04: Ka KSU Mawkyrwat Circle haka 03.11.2018 ka la ioh ban plie pyrda iaka ” 1st (Late) Hesliyar Lyngkhoi Memorial Cricket Tournament, 2018″ ha Madan jongka Maharam Government Higher Secondary School, Mawkyrwat.
Ha kane ka sngi, u Bah H.S Diengdoh, SDO jong ka Ranikor Civil Sub Division u la long u Kongsan ha ka jingiadon ryngkat jong u Bah R.R Lyngkhoi Myntri Shnong Mawkyrwat, u Samla Forwardman Nongrem President, KSU South West Khasi Hills District, u Bah Walton C.D Toi President, Seng Samla Shnong Mawkyrwat, ki Nongialam ka KSU Mawkyrwat Circle, u Principal ka Maharam Government Higher Secondary School, Mawkyrwat bad kiwei kiwei ki riew rangbah.
Ia kane ka jingialehkai Cricket Tournament la pynlong kum shibynta ban sah jingkynmaw ia une u Nongialam bad Myntri Shnong jong ka Shnong Mawkyrwat ba la bam kwai ha dwar u Blei uba la trei shitom na ka bynta ban rat dyngkhong iaki jingsniew ha iew Mawkyrwat haki por mynshwa bad ruh halor ka jingiatrei lang borbah bad ka seng kum u Nongialam Shnong haki por jong ki bynta bapher bapher ba ka seng ka don ban pyntyllun na ka por sha ka por haba ka Jaitbynriew ka donkam.
Ka jingpynlong ia kane ka Tournament ka long ban lum lang iaki samla ka Shnong Mawkyrwat ban iatylli lang kawei ha ka ban rat iaki jingsniew kiba la sdang suhthied ha Mawkyrwat kum ka kyiad bad khamtam ban iashimbynta ban ialap bad rat dyngkhong ia u drok. Haba kren ha kane ka jingialang hashwa ban sdang ka jingialehkai , u Samla Forwardman Nongrem.
President KSU South West Khasi Hills District ula ban jur ba ka donkam iaki samla ban don iaka mynsiem jongka jingiatylli, ban don ka jingkitkhlieh , ban kiar naki jingsniew kum u drok bad kiwei kiwei bad u la ong ruh ba ” Ka jingjot ka imlang kam dei ba ki bun ki riewsniew hynrei ka dei ka jingsngapjar jongki briew kiba bha”.
U Bah H. S Diengdoh uba long u Kongsan ha kane ka sngi u la iaroh iaka KSU ka ba la pynlong ia kiba kum kane ka Tournament ka bym pat da paw than haka thain bad ruh halor ka jingkynmaw ia ki Nongialam ba la leh iaki kam bha haka imlang sah lang. U Bah Diengdoh u la kyntu ruh iaki samla ba ki dei ban kiar naki jingsniew jong u drok namar kane kan pynjot ym tang ia ki samla ba la kyrni hynrei ka pynjot ruh iaka ing ka sem, ka shnong ka thaw bad iaka Jaitbynriew baroh kawei.
Ka jingialehkai ha kane ka sngi ka la long hapdeng ka Chidus Cricket Club pyrshah iaka TTJ Cricket Club. Ka Chidus Cricket Club kaba la tied nyngkong ka la lah ban kamai tang 63 runs bad liem baroh ki wicket. Haba beh ia kane ka thong, ka TTJ Cricket Club ka la lah ban jop da kaba suk da 6 wickets.
