Shillong, Kyllalyngkot 16: Ka seng Meghalaya Pradesh Mahila Congress (MPMC) mynta ka sngi kala pynlong ia ka jingpyrta ha Congress Bhavan ban pyrshah ia ka Citizenshi
p (Amendment) Bill, 2016. Ha kane ka sngi bun na ki nongkit kam jong ka seng kynthei Congress kila ia poi sha kane ka jingialang ha ophis ka party ha Thana Road Shillong.
Ka kong Joplyn Scott Shylla president jong ka MPMC kala ong ba kum ki seng kynthei jong ka ki pynlong ia kane ka jingiapyrta mynta ka sngi ka long ba ka sorkar BJP ha Delhi kan ioh sngew ia ka jingpyrshah ki briew jong kane ka jylla Meghalaya ia ka CAB,2016.
Kala ong ba wat mynta ka jylla Meghalaya kala don ha pdeng ka jingeh ha kaba ia dei bad ka kam ka jam lada wan lei sha kita ki briew kiba dei na kawei ka Ri kumno kan ktah ia kane ka jylla ha ka liang ka ioh kam ioh jam.
Ka jingthmu jong ka MPMC mynta ka sngi ka long ban leit sha ophis jong ka BJP ban pynpaw ia ka jingpyrshah hynrei ki bor jong ka District Adiminstration kim shym la shah namar ka don ka 144 CrPC kumta kila pynlong noh ia kane ka jingiapyrta ha ophis jong ka party la ong ka kong Joplyn Scott Shylla president ka MPMC.
Ha kane ka jingpynpaw jong ka MPMC la ong ba da ki spah ngut ki nongkit kam jong ka seng Congress kila ia poi ban ia shim bynta ban pynpaw ia ka jingpyrshah ka jong ki ia kane ka CAB,2016.
