Shillong, Iaiong 13: U bah Lambor Malngiang shongknor jong ka Meghalaya State Planning Board, u la ong ba ka ha ka jinghuri hura kaba la jia ha Mawshabuit kala wanrah ia ka jingmynsaw jong ki riew paidbah ha kaba saw ngut ki dkhot ka KSU kila mynsaw kiba dang don ha pdeng ka jingsumar ha Hospital.
Kane ka jingiatyngkhuh hapdeng ki paidbah bad ki shipai kam dei shuh ka sien kaba nyngkong hynrei kila jia na ka por sha por ha kaba ia dei bad ki shipai kiba la juh klun jaka na ka por sha ka por bad kane ka jingleh kala juh jia na ka por sha ka por na ka liang jong ki shipai.
Kane ka jingleh don bor jong ki shipai kiba dei na ka 58-GTC namar ka ain ka dei ka ain haba ia dei bad kane u la ong ba un sa thoh sha u myntri kor bar ri jong ka Ri India namar kane ka jingleh ki shipai ka long kum ka jingpyndik bad pynjynjar ia ki paidbah.
Haba ia dei bad kane ka jingjia un sa khot ia ka Deputy Commissioner jong ka East Khasi Hills ban ia kren ia kane ka kam, ia ka surok ban leit sha Mawshabuit la shna naduh ka por jong ka jylla Assam bad ia kane dei ban ia pynbeit ba ka sorkar pdeng ban ia buh dak ia ki jaka kaba ki paidbah ki iaid lynti.
Ban pynsuk ia ka leit ka wan jong ki paidbah hap ban don da kawei pat ka lynti ban weng ia kane ka jingeh bad halor kane yn sa phah da ka jingthoh sha u myntri korbar ri bad kane ka long ban weng ia ki jingeh kaba ki paidbah ki ia kynduh bad ki shipai ha kane ka jylla.
Ka sorkar India ka dei ban leh kumba leh hapoh Manipur, ha Imphal ba kumno ka sorkar pdeng kan iada ia ki jaka jong ki paidbah bad ka dei ban don ka jingbuh dak kaba shai ba ki shipai kim bit ban pynthud.
La ong ka juh don ka jingiakynad hynrei kum ki shipai kim dei ban leh don bor namar ki shipai ki dei ban leit ia leh thma bad ki bar ri ym ban ia khun bad ki paidbah hapoh ka Ri India.
