Shillong, Naitung 13: Ka Sur u Paidbah ka Bri Hynniewtrep (KSUP7T) mynta ka sngi kila ia kynduh ia u myntri rangbah ka jylla u Conrad K Sangma ban ia kren halor u pud u sam hapdeng ka jylla Meghalaya bad ka Assam kaba ym pat lah ban ia pynbeit haduh mynta ki sngi.
U Bah Rasting Thabah shongknor ka kynhun haba kren ha ki lat pathai khubor ha dien ba la dep ban ia kynduh ia u myntri rangbah la ong ba ha kane ka jingiakynduh la ong ba katkum ka jingpyntip jong ka sorkar ha u snem 2012-2013 ba ki don 12 tylli ki shnong kiba don ha pdeng ka jingiakajia.
Ha kane ka jingiakynduh na ka liang jong ka KSUP7T ka dawa na u myntri rangbah ka jylla ba dei ban buh ia kane ha ka website jong ka jylla Meghalaya ban ia tip paidbah kiei kita ki 12 tylli ki shnong kiba don ha pdeng ka jingiaknieh.
Kuba ka long katkum ka jingtip tang hapoh ka Block-I ki don 31 tylli ki shnong kiba hap hapoh jong ka Laban Nongphylut Doloiship, kaba kyntup ia ki lai tylli ki raid, ka Laban,Nongpyllut, Nongjrong, hapoh kine kine 31 tylli ki shnong ki don kumba 10618 ngut ki nongshong shnong, halor kane ki kwah ban ioh ia ka jingshai.
Ha kane ka jigniakren kila dawa na u myntri rangbah ka jylla ba un khot ia ka dorbar ba kyrpang ban thaw noh ia ka “Meghalaya Land Boundary Committee” kaba kynthup ia u shongknor na duh u myntri ba dei peit ia ka khyndew, dei ban kynthup ia ki wei ki dkhot bad ia ki CEM jong ki District Council, ki hima kiba don ia ki pata.
Katba ym pat lah ban pynbeit ia kane ka sohkyrdot, bun kiba la shim kabu politic na kane por sha ka por, haba ia dei bad ki kam pynroi kila ai jingmut sha ka sorkar ban mang pisa kyrpang shiklur sha ki Deputy Commissioner ba kin pyntrei kam ia ki kam pynroi.
U Bah Thabah u la ong ba ki MLA ki dei ban ai T.10 lak bad ki MDC ki dei ban ai T.5 lak sha ka Hima Khyriem, Hima Mylliem, Hima Nongkhlaw, Hima Sohiong bad kiwei ba kin thung ia ki mawpud.
U bah Thabah la pynkynmaw ba u bah Martin Narayan Majaw bam kwai ha dwar u blei ha ka por ba long myntri tang 13 bnai ha u snem 1978, u la rat ia u mawpud ha Khanduli, la weng ia ka khyrdop ha Byrnihat bad u la pynmih ia ka jingpynbna ia ka Meghalaya Land transfer Act, 1978.
Ha kane ka jingiakynduh na ka liang jong u mytnri rangbah u la kyntu ia ka sur u paidbah ba kin ia treilang bad ba kin ai jingmut sha ka sorkar lada ki don namar ka sorkar kwah ban pyndep ia kane ka jingiapynbeit pud kaba la shah teng.
U bah Egenstar Kurkalang General Secretary u la ong ba ki briew kiba sah ha khappud ki shem jingeh shibun namar ki shah thombor ha kiba bun ki long namar kim ioh ia ka kard ration, ne ia ki skhim NERGA kaba la tip kum ka bylla shispah sngi.
Na ka liang jong ka sur u paidbah kan dang iai bteng ban ai ia ki kot ki sla sha ka sorkar ban peit ba lah ban ia pynbeit ia kane ka jingeh ha kaba ia dei bad ka kam pud kam sam, la kynduh ia ki nongialam seng bhalang bad kkwei kiwei khlem da shim kabu ha ka sain pyrthei ha kaba ia dei bad kane ka kam pynbeit pud. Naduh u snem 1951 ter ter haduh mynta kila don kum ba 300 tylli ki shnong kila jah.
