New Delhi, Risaw 25: U Myntri Rangbah Duh ka ri, u Narendra Modi u la plié ia ka PM Ayushman Bharat Health Infrastructure Mission. U la plié ruh ia ki skhim bapher bapher na ka bynta ka roi ka par kiba kot sha ka T. 5200 klur na ka bynta ka Varanasi.
U Lat bad u Myntri Rangbah ka Jylla Uttar Pradesh, ki Myntri Sorkar Pdeng kum u, Dr Mansukh Mandaviya bad Dr Mahendra Nath Pandey, ki Myntri Sorkar Jylla bad ki riewpawkhmat ki la iadon lang ha kane ka sngi.
Ha ka jingkren jong u, u Myntri Rangbah Duh u la ong ba ka ri ka la kot sha u mawmer haba ka la lah ban ai haduh 100 klur tylli ki dawai tika ha ka jingialeh jong ka pyrshah ia ka khlam corona.
“Lyngba ka jingkyrkhu jong u Baba Vishwanath, da ka jingksan jong ka Maa Ganga, da ka jingngeit jong ki briew ka Kashi, ka kam ban aiei ia ki dawai tika ka dang iaid beit,” u Myntri Rangbah Duh u la ong.
U Myntri Rangbah u la pynpaw ruh ia ka jingsngewsih haba u ong ba hadien ba ka ri ka la ioh ia ka jinglaitluid, ym shym la don ka jingpeit bniah ia ki jingdon jingem kiba iadei bad ka jingai jingsumar da ki snem.
Namar kane, ki briew ki hap ban mareh shane shatai ban ioh ia ka jingsumar kaba biang bad kumta ki dang kham pang dang shitom shuh shuh ha ryngkat ka jingswai ki jingdon jingem, u la ong.
Kane ka la ialam sha ka jingkhuslai shaphang ka jingioh jingsumar khamtam ha ki briew kiba kham duna jingioh. Kito kiba la don ha ka por Sorkar da ka snem kim shym la pynbiang ia ki jingdonkam bad kim shym la peit ia ka roi ka par kaba ryntih.
U Myntri Rangbah Duh u la ong ba ka PM Ayushman Bharat Health Infrastructure Mission ka thmu ban pynbeit ia kane. Ka thong ka dei ban pynkhlain ia ki kam ai jingsumar kiba kongsan ha ki shnong, ki block, ki distrik, ki thain bad ka ri baroh kawei ha kine ki 4 lane 5 snem ban wan.
Ha ka jingbatai bniah shaphang ki sienjam jong ka Sorkar hapoh kane ka Mission, u Myntri Rangbah Duh u la ong ba ki don 3 tylli ki bynta ba kongsan jong ka Ayushman Bharat Health Infrastructure Mission ki ban pynbeit ia ki jingduna ha ki kam ai jingsumar jong ka ri.
Kaba nyngkong ka iadei bad ka jingshna ia ki jaka ban wad bniah bad ban ai jingsumar. Hapoh kane, dang plié ia ki Health and Wellness Center ha ki shnong bad ki nongbah ha kaba yn lah ban lap wut wut ia ki jingpang bapher bapher.
Ki kam kum ka jingiakren bad ki doctor, ki test ba ioh ei, ki dawai ba ioh ei kin don ha kine ki centre. Na ka bynta ki jingpang ba kham jur, dang kyntiew ia ka jingdon ki jingthiah nongpang da 35 hajar tylli ha 600 tylli ki distrik bad yn don ruh ki jaka ai jingsumar ha 125 tylli ki distrik.
Ka bynta kaba ar jong ka skhim ka iadei bad ka kam wad bniah ia ki jingpang. Hapoh kane ka mission, yn pynbiang ia ki jingdonkam na ka bynta ka jingwad bniah bad ka jingbuddien ia ki jingpang. 730 tylli ki distrik ka ri kin ioh ia ki Integrated Public Health lab bad 3 hajar tylli ki block kin ioh ia ki Block Public Health Unit.
Shuh shuh, sa 5 tylli ki Regional National Centers for Disease Control, 20 tylli ki Metropolitan unit bad 15 tylli ki BSL lab kin pynkhlain shuh shuh ia kane ka kam, la ong u Myntri Rangbah Duh.
Ka bynta ba lai ka dei ka jingpyniar ia ki kam jong ki jaka ba wad bniah ha kaba ki peit ia ki khlam. Yn pynkhlain ia ki 80 tylli ki Viral Diagnostic bad Research lab kiba la don lypa, yn pyntreikam ia 15 tylli ki Biosafety level 15 lab, yn plié ruh ia 4 tylli ki National institute of Virology bad ka National Institute na ka bynta ka One Health.
Ka jaka wad bniah jong ka WHO na ka bynta ka South Asia ruh kan pynkhlain ia kane. “Kane ka mut ba lyngba ka PM Ayushman Bharat Health Infrastructure Mission kan don ka rynsan na ka bynta ka jingai jingshakri naduh ka jingai jingsumar haduh ka jingwad bniah ha man ki bynta jong ka ri,” la ong u Myntri Rangbah duh.
U Myntri Rangbah Duh u la kren ruh shaphang ki lad ioh kam kiba mih na kane da kaba ong ba ka PM Ayushman Bharat Health Infrastructure Mission, ha ryngkat ka koit ka khiah ka dei ka lad na ka bynta ka aatmnirbharta. “Ka dei shi bynta jong ka jingpyrshang ban wanrah ia ki kam ai jingsumar kiba ryntih.
Kane ka mut ka jingai jingsumar kaba baroh ki lah ban kot bor.” U Modi u la ong ba ka kam ai jingsumar kaba pura ka peit ia ka bha ka miat ha ryngkat ka koit ka khiah. Ki skhim kum ka Swachh Bharat Mission, Jal Jeevan Mission, Ujjwala, Poshan Abhiyan, Mission Indradhanush ki la pyllait ia ki briew na ki jingpang.
Palat 2 klur ki briew kiba duna jingioh ki la ioh jingsumar ei hapoh ka Ayushman Bharat Yojna bad la pynbeit bun ki kam kiba iadei bad ka koit ka khiah lyngba ka Ayushman Bharat Digital Mission, la ong u Myntri Rangbah Duh.
U Myntri Rangbah Duh u la ong ba mynta ka don ka Sorkar Pdeng bad ha ka jylla kaba sngewthuh ia ki jingeh jong kiba duk ba suk, kiba shah ieh bein, kiba shah nion bein, kiba sahdien bad kiba duna ka ioh ka kot. “Ngi dang trei borbah ban kyntiew ia ki kam ai jingsumar ha ka ri,” la ong u Myntri Rangbah Duh.
U Myntri Rangbah Duh u la ong ba ka jingstet ban plié ia ki medical college ha Uttar Pradesh kan plié lad ia ki samla ba kin pule ban long doctor. Namar ka jingbun ki seat, mynta ki khun jong kiba duna jingioh ruh ki lah ban long doctor bad pynurlong ia kane, u la ong.
U Myntri Rangbah Duh u la kren shaphang ki jingeh mynshuwa jong ka shnong Kashi bad u la ong ba ki briew ki la shu hun la ka hun ia ka jinglong jingman.
Kine baroh ki la kylla bad mynta ka Kashi ka dei kajuh hynrei ki don ki jingpyrshang ban wanrah ia ki jingkylla. “Ki kam ba la leh ha Varanasi ha kine ki 7 snem ba la leit ki dei bym pat leh ha ki phew snem ba la dep,” u la ong.
U Myntri Rangbah Duh u la kren shaphang ka jingiaid shaphrang ka BHU bad u la ong ba kane ka dei kawei na ki jingjop jong ka Kashi ha kine ki snem ba la dep. “Mynta na ka teknoloji sha ka kam ai jingsumar, ki jingdon jingem bym pat ju iohi ki la wan sha ka BHU. Ki samla na kylleng ka ri ki la sdang wan shane ban ioh jingpule,” u la bynrap.
U Modi u la iaroh ruh ia ka jingkiew 60 % ha ka jingpynmih bad 90 % ha ka jingdie ia ki Khadi bad kiwei kiwei ki mar jong ki karkhana rit ha kine ki 5 snem ha Varanasi. U Myntri Rangbah Duh u la kyntu ia ki briew ba kin kyntiew ia ki mar ba la shna hi ha ka ri.
U la ong ba kane kam mut tang ia ki sharak diya hynrei ka mut kano kano ka mar kaba la shna da ka jingtrei shitom ki briew ka ri bad kaba donkam ia ka jingkyntiew bad ka jingkyrshan jong baroh ki briew jong ka ri ha kane ka por jong ki tamasa bapher bapher.
