Mairang, Jymmang 02: Kum shibynta ban iada ia ki dohum dohwah bad na ka bynta ka jingshngain jong ki paidbah nongshongshnong, u District Magistrate ka Eastern West Khasi Hills District ha ka hukum ba la pynmih hapoh ka section ba 144 jong ka CrPC u la pakhang ia ka jingber ia kino kino ki jait dawai ha shilynter ka Wahkhri kaba don ha Eastern West Khasi Hills District.
Katkum ka hukum u District Magistrate, ka jingber ia ki dawai ha ki wah ka pynjaboh bad pynlong bih ia ki bad ka wanrah kylla ia ka jingiap jong ki dohum dohwah, kaba ktah pat ia ka koit ka khiah bad ka iap ka im jong ki paidbah nongshongshnong.
Kino kino kiba pynkhein ia kane ka hukum kin shah pynshitom katkum ka section ba 188 jong ka Indian Penal Code, 1860 bynrap shuhshuh ka hukum u District Magistrate.
