Shillong, Jymmang 07: Ha ka jingialang
kaba la pynlong da ki samla ka dong shatei lam mih ngi jong ka Ri India kiba don ha Bangalore, na ka ling jong ka sorkar jylla Meghalaya la leit ban mihkhmat da u bah Sanbor Shullai MLA jong ka 19-Shillong South ba dei na ka party BJP ba ia don lang ha ka sorkar MDA.
Ha kane ka jingiakynduh ia u Bah Sanbor ka KSU Bangalore Unit kala ai ia ka dorkhas sha u Myntri Rangbah ka jylla lyngba u Bah Shullai, ha kane ka dorkhas na ka liang jong ka KSU kala dawa na ka sorkar Meghalaya ba ka dei ban buh noh ia ka Meghalaya House ha poh ka nongbah Bangalore na ka bynta ka jingdon kam jong ki briew kane ka jylla kiba trei bad kum juh kiba pule sha katei ka jylla.
Ha kane dorkhas na ka liang jong ka KSU kala kyntu ia ka sorkar ba ka dei ban buh noh ia ka “Help Line” ha kane ka nongbah na ka bynta ka jingdon kam ki briew jong kane ka jylla. Ka KSU kala kdew ba kumba ka long mynta ki briew jong ka North East kiba don ha kylleng jong ka Ri India kim don ha ka jingsngewshngian bad kum juh kane kala pur wad sha Bangalore kaba ki briew kane ka thain ki ia beh ban leit pule.
Ka seng kala dew ruh ba bun na ki samla pule na kane ka jylla kila shah thok ha ki nongpynrung klass kiba don na ka nongbah Bangalore bad kiba don ha Shillong, ka KSU ka kyntu ia ka sorkar ba ka dei ban peit ruh ia kane ka jingeh jong ki samla pule kane ka jylla. Ka sorkar ka dei ban peit bha ia kane bad kadei ban pynsangeh iakum kine ki kynhun namar ka thong jong ki ka long tang ban kamai pisa.
Ha ka juh ka por na ka liang jong ka seng KSU ka ai khublei ia u myntri rangbah u ba la shimti ia kane ka kam bad ki don ka jingkyrmen ba hapoh ka jingialam ka jong u myntri rangbah ka jylla u Conrad K Sangma ki jylla kam dang kiew ha baroh ki liang, kane ka long katkum ka kyrwoh kaba la phah da u Bah Rymphang Nongsiej President ka KSU Bangalore Unit bad u Bah Emosjohn general secretary KSU Bangalore Unit.
Ha kane ka jingiakynduh lang la don lang ruh u Bah Shibun Lyngdoh President jong ka seng BJP bad u Bah David Kharsati Vice President jong ka party BJP ha ka por ba ki dkhot jong ka KSU ki ai ia ka Dorkhas sha u Bah Shullai ha ka sngi u blei ha Bangolre.
