Jowai, Rymphang 19: Ka AJYWO Central Body ka ai ia ka jingiaroh ia u Ma Justine Dkhar, MLA jong ka 6th Khliehriat Legislative Assembly Constituency halor ka jingpynkynriah noh ia ka Khliehriat C & RD Block sha ka thaiñ Wapung bad ruh ai kyrteng thymmai pat ia ka da ka Wapung C & RD Block.
“Na ka liang jong ka AJYWO, ngi da pynpaw ruh ia ka jingsngewnguh ka ba haduh katta katta ia u tei u Nongmihkhmat jong ka thaiñ Khliehriat u ba la trei shitom met bad mynsiem ha ka ban pynurlong noh ia katei ka jingkular jong u ia ki paidbah da kaba pynkynriah noh iakatei ka ophis sorkar ba donkam bha na ka Nongbah Khliehriat sha ka thaiñ Wapung kat kum ba la thrang da u paidbah jong ka ka thaiñ”, ong u Bah M H Dkhar, President jong ka AJYWO Central Body.
“ U Bah M H Dkhar u la bynrap shuh shuh da kaba ong ba ka AJYWO, ka sngewnguh shuh shuh ia utei u MLA jong ka thaiñ namar ba da ka jingpynkynriah noh ia katei ka C & RD Block sha katei ka thaiñ ba mynta, iatei ka jaka ha Khliehriat ia kaba la bat la baroh shi katta da ka Khliehriat C & RD Block, ka seng ka thrang ba ka sorkar kan aiti noh ia ka sha ka Health Department na ka bynta ban pyniar shuh shuh ia ki jingtei bad jingtreikam ka jong ka Civil Hospital, Khliehriat kaba ki paidbah jong ka district ki thrang mynta mynta dik dik ba ka sorkar ka dei ban plie noh ia ka”.
Ha ka jingiadei bad ka jingpynkynriah noh ia Khliehriat C & RD Block sha ka Wapung C & RD Block, ka AJYWO, ka AJYWO ka pynpaw ruh ia ka jingsngewnguh iaka sorkar Meghalaya hapoh ka jingialam u Dr Mukul Sangma, Chief Minister bad ruh khamtam eh ia u Bah Prestone Tynsong, MLA, bad u Ma Sñiawbhalang Dhar, MLA ki ar ngut ki Myntri Sorkar ba dei peit ia ka C & RD Department ha ki por kiba la dep bad ba mynta, bad ruh ia u Bah Phasmon Dkhar, MDC, Executive Member jong ka JHADC bad ruh ia ki arngut ki Deputy Commissioner jong ka East Jaintia Hills District ba lah leit bad ba mynta kata ia u Bah WR Lyngdoh, IAS bad u Bah MS Lhuid, IAS bad ruh ia u Bah C.P Mawkon, MCS BDO jong ka C &RD Block ba rim bad ba thymmai mynta halor ki bynta ba pher bapher baroh kiba ki la trei shitom ban pynkynriah noh iakatei ka C & RD sha ka jaka kaba ka dei ban don mynta.
Ka AJYWO ka pynpaw ruh ia ka jingsngewnguh ia ki ar Dorbar Shnong, kata ia ka Dorbarshnong Wapungskur bad ka Dorbar Shnong Wapungshnong halor ka jingkylluid mynsiem jong ki da ka ba ai ei ia ka jaka kaba heh, ba itynnad bad ba bha tam na ka bynta ban tei iakatei ka C & RD Block ba mynta ha ka thaiñ Wapung halor ruh halor ka jingiasnoh kti lang jong ki ban pynsted iakatei ka kam, la ong biang u Bah Dkhar.
“Ha ka jingiadei bad ka Wapung C & RD Block: Wapung, na ka long jong ngi ka AJYWO, ngi kyntu ia ka sorkar jylla lyngba ka C & RD Department bad ruh ia ki ar Dorbar Shnong bad khamtam eh ia u Ma Justine Dkhar, MLA bad kiwei ki Ophisar Sorkar ba ia dei kam ba katei ka Block kaba thymmai ba kin pynsted noh katba lah noh ia ka Ophis bad ki Quarter jong katei ka Ophis ha katei ka jaka khnang khnang ba yn ioh ban pyndonkam ia katei ka jaka ba rim na ka bynta ka jingmyntoi jong u paidbah.
Ha kaba pynkut ia u kyrwoh, u Bah Dkhar u la buh ia ka jingdawa ha khmat jong ka Sorkar Meghalaya da ka ba ong “Namar ba East Jaintia Hills District ka dei ka district ka ba heh bad bun paid, ka AJYWO na ka bynta ka jingmyntoi jong u paidbah jong ka district, ka dawa na ka Sorkar ba kan plie noh sa kawei ka C & RD Block ha ki thaiñ Lumshnong lane Umkiang”.
