Shillong, Nailur 30: Ka jingialang jong ka cabinet mynta ka sngi kala shim ia ka rai ban ai jingbit ia ka Meghalaya Energy Corporation Limited (MeECL) ba kan shim ram T.469.32 klur na ka Power Finance Corporation Limited (PFC) ba kan dup ioh ban siew ia ka bai light sha ka North Eastern Power Co-operation Limited (NEPCO).
U myntri rangbah ka jylla u Dr Mukul Sangma u la ong ba kane ka dei ka sien kaba ar ba ka sorkar ka hap ban bah khlieh ia ka MeECL ba kan shim ram na ki seng bei pisa ban siew ia ka bai light sha ka NEPCO.
La iathuh ba ki don kiwei ruh ki company kaba ka MeECL ka dang dei ban sniew lada shim kyllum baroh ka bailight ba ka MeECL ka pynsah ha kane ka jingthied ia ka bor ding eleltrik ka long T.767 klur tyngka.
Ha ka juh ka por ba bthah ia ka MeECL b aka dei ban pynbeit ia ki jingtrei kam ki jong ka ha kaba lum thikna ia ka bai light kaba dei na ki nongthang light. Katkum ka jingkhein kaba la ai da ka MeECL sha ka sorkar ka bailight b aka dei ban ioh kynthup na ki iing sorkar, ki karkhana bad na ki riew shimet ka long T.350 klur.
Ban pynbeit ia ki jingeh kiba don hapoh jong ka MeECL la bthah ban thaw ia ka committee kaba kyrpang ha kaba kin don ki briew jong ka MeECL bad na ka tnad pla pisa jong ka sorkar jylla kumno ban leh ha kaba ia dei bad ka jinglum ia ka bai light.
Wat la u myntri rangbah ym shym la kren shai ia ka jingdkoh ia ka rukom lum bai light jong ka MeECL na ki paidbah, hynrei u la shu ong ba ka MeECL ka dei ban pynbeit ia ki jingeh baroh katkum ka juk stad kaba mynta bad ki paidbah jong ka jylla ruh ki dei ban ioh ia ka bor ding eletrik 24X7.
