Shillong, Jymmang 08: Ka Hynniewtrep Youth Council hadien ka jingleit jurip lang ia ka jaka ha lum survey kaba hap hapoh ka jingpeit jong ka Cantonment hapoh ka jingkhmih ka Defence Estate Officer, kala kyrpad ia ki bor pyniaid District jong ka East Khasi Hills District ba kim dei ban pynslem ban kyndang noh ia kiba sah beain ha kane ka jaka.
Ha shwa jong kane, u Deputy Commissioner ka East Khasi Hills u SC Sadhu ha shwa ban kut ka por ba la ai da ka seng HYC u la bthah ia u SP ka East Khasi, u CEO ka Shillong Municipal Board, ia u Secretary ka MUDA, ia u CEO ka Shillong Cantonment Board ba kin pynlong ia ka jingleit jurip ia kane ka jaka.
Ha kane ka jingleit ban jurip ia kane ka jaka ba shong basah beain ha lum survey la lap ba ki don kumba 40 tylli ki iing kiba la khang tala bad don ruh kiba plie hynrei kiba bun ki don tang ki kynthei.
Na ka liang jong u Deputy Commissioner ka East Khasi Hills District ula phah ia u ADC u A.G Momin u la dep ban shim kyrteng lut ia baroh ki briew kiba don bad kumjuh ruh ia ki iing kiba khang tala ban leh ia kaba donkam.
Haba ia kren bad ki lad pathai kubor u Bah Roykupar Synrem u la kyntu ia ki bor pyniaid District ba hadien ba kila lap hi da la ki jong ki khmat, u DC um dei shuh ban pynslem ban kyndang bad lada kim leh kloi ka seng kan wer ia ki paidbah ka bri u hynniewtrep ban wan kyndang lang bad ka seng HYC.
Halor ka jingkam u DC ba ka don hapdeng ka jingialeh mukot duma, ba ka jaka ba don ka mukot duma ka dei tang ha ki bynta ba lum ia ki tiar jot ne ka jaka balum ia ki bitor bad ki plastic, kumta ki bor pyniaid District kidei ban kyndang noh ia baroh kine ki ba sah beain namar ba kane ka jaka ba sah ma ki kam shym la don satia ha ka jingialeh mukot duma.
