Shillong,Risaw 30: Ha dien ka jingiakren kaba la iaid ar snem lynter ka sorkar Bangladesh kala ai jingbit ia ka Ri India ban pynioh optic fiber sha ki jylla jong ka dong shatei lam mih ngi jogn ka Ri India lyngba ka Chittagong port sha Agartala bad na kane ka jaka yn sa pynpur sha baroh kawei jong kane ka dong shatei lam mih ngi jong ka Ri India.
U Bah DP Wahlang Commissioner Secretary Information Technology and communication jong ka sorkar Meghalaya haba kren ha ki nongthoh khubor ha ka jingiadon lang ka myntri ba dei peit ia ka tnad IT ka kong Ampareen Lyngdoh u la ong ba ka jingeh kaba ia kynduh ha kaba ia dei bad ka Internet ka long namar ba la jngai palat u lain ban wan rah sha NE na ka dewbah jong ka Ri India.
Kane ka jingthud jong ka Internet ha North East ka dei na ka jingthud ki optical Fiber ha ki bynta jong ka Maldan bad Siliguri hapoh jong ka jylla West Bengal shuwa ban rung sha kane ka thain, u la ong ba ka daw jog ka jingthud baroh ka dei namar bym biang ka dei namar ba line kam long .
Hynrei da ka jingai jingbit jong ka sorkar Bangladesh ia ka Ri India ban pyniasoh ia kane ka dong shatei lam mih ngi jong ka Ri India da u optic fiber lyngba ka duriaw na Chittagong, lyngba jong ka Agartala kane kan sa pynsted ia ki Internet ha kane ka thain baroh kawei ban ia ryngkat bad kiwei kibynta ha ka Ri India.
Ha ka Ri India baroh kawei kumba ka long mynta kine ki optical fiber kiba wan lyngba ka duriaw ki don tang ar jaka, kawei ha Mumbai bad kawei ha Chenai, da ka jingioh ia kane ka jaka ha Chitagong ban pynrung sha kane ka thain shatei lam mih ngi jong ka Ri India kan sa pynbha ia ka jingring Internet bad shisien ba la dep kane ka jingtrei ki internet ha kane ka thian kin sa sted kumba sted ha kiwei ki bynta jong ka Ri India.
Ka myntri ba dei peit ia ka tnad IT ka kong Ampareen, kala iathuh ba kala ioh shibun ki jingjur na ki paidbah kaba ia dei bad ka jingthud jong ka Internet ha kaba kam shym la lah ban ai ia ka jubab kaba biang namar ki dei ki kam kiba eh ban sngewthuh hynrei da kane ka jingpynshai kan iarap shibun bad ka sorkar ka kaloi ban leh ia katba shah ka kam hapoh jong ka sorkar jylla ba kane ka kam kan iaid sted ba ki paidbah kin ioh ia ka internet kaba biang ban pynurlong ia ka jingpyrta “Digital India”.
