Shillong, Nohprah 12: Ka seng Hills Farmer Union (HFU) jong ka jylla Meghalaya ka ai khublei ia u myntri rangbah ka jylla u Conrad K Sangma u ba la pynbna ha ka dorbar bah ki nongrep kaba la long ha Tura.
Haba kren ha ki lad pathai khubor u President ka seng u bah Commander Shangpliang u la ong ba kum ka seng ki ai khublei ia ka sorkar halor kane ka jingpynbna hynrei kaba kongsan ka long ba ka sorkar ka dei ban da pynmih da ka jingthoh ne ka jingpynbna sorkar.
La iathuh ba ha ka dorbar bah ki nongrep kaba la long nyngkong ha u snem 2018 ha ka 4th Nohprah, ka seng kala buh haduh kumba 50 tylli ki mad jigndawa, hynrei na kitei ka sorkar kala ong ba dei ban phah noh tang 10 tylli, na kine ki shiphew tylli, kiba la pyntreikam mynta ki long tang lai tylli.
Kine ki long, ka Meghalaya Farmers Commission, ban iathuh ia ka 4th Nohprah kum ka sngi jong ki nongrep bad u snem 2020 kum u snem jong ki nongrep. Haba ia dei bad u snem jong ki nongrep ka seng ka kyntu ia ka sorkar ba ka dei ban mang pisa kyrpang kham bun ia ka tnad rep.
Na ka liang jong ka HFU ka kyntu ia ka sorkar ba ka dei ban wad ia ka iew na ka bynta ki nongrep kum sha ka Ri Bangladesh, namar haba ka don ka iew ki paidbah kin dangrep shuh shuh ia ki marrep.
Na ka liang jong u President u bah Shangpliang u la pynpaw ia ka jingsngewsih ban iohi ba ka sorkar haduh mynta kam don ia ka jingbuh jingkhein ia ki nongrep kiba don ha ka jylla Meghalaya dei na kane ka daw ba ki nongrep ha kane ka jylla kim ioh ia ka PM Kisan.
