Shillong, Lber 12: Ka seng ki nongshna phlim hapoh ka jylla ka Meghalaya Film Makers Association (MefilMA) ka la ai khublei ia u Conrad Sangma myntri Rangbah ka jylla halor ka jingkular ban thaw noh da ka film policy na ka bynta ban kyntiew ia ki kam shna phlim ha ka jylla.
U President jong ka MeFilMA, Bah Commander Shangpliang haba kren ha ki nongthohkhubor u la iathuh ba ka seng hadien ka jingialang jong ka seng lem bad ki tyngshop ki puron ka la ai khublei ia ka sorkar kaba la mynjur ban pynlong ia ka Film Festival, ban thaw ia ka film policy bad kumjuh ruh halor ka jingmang tyngka na ka bynta ban kyntiew ia ki kam shna phlim.
U bah Shangpliang u la iathuh ba dangshen na ka liang jong ka ki dkhot ka seng ki la iakynduh ia ki bor sorkar ban pynkynmaw halor ka jingdawa jong ka seng bad ka la pynpaw ia ka jingsngewkmen ba u Conrad Sangma u la kular da kaba kren ha ka budget speech ha Assembly.
U bah Shangpliang u la iathuh ba kane ka dei ka sien kaba nyngkong ba ka sorkar kan leh ei ei na ka bynta ki kam shna phlim. U la iathuh ruh ba ka seng kan sa pynlong ia ka jingrakhe ia ka jingdap 12 snem jong ka seng ha ka 18 tarik u bnai jylliew, 2022.
