Shillong, jylliew 13: U pastor Rev Sanborly Diengngan ryngkat bad kiwei ki pastor kila pynpaw ia ka jingsngewnguh kaba khraw ia ka sorkar jong u Dr Mukul Sangma kaba la wanrah ia ka jingpynkylla halor ka Meghalaya compulsory registration of marriage act 2012 .
U bah V.G Kynta u muktiar haba kren ha ki nongthoh khubor mynta ka sngi ula ong ba na ka liang jong u Rev Sanborly Diengngan un nym bteng shuh ia ka mukot duma kaba ula ai hapoh jong ka Meghalaya High Court pyrshah ia ka MCRM Act 2012 namarba ka sorkar kala wanrah ia ka jingpynkylla ia katei ka ain ia kaba la tip kum ka Meghalaya compulsory registration of marriage (Amendment) act 2017.
Da kane ka jingpynkylla ia katei ka ain kala pynioh biang ia ka jingithuh ba ia ka certificate iathoh ba la ai da ki pastor ki phadar la ithuh biang da ka ain katkum ka “ Indian Christian Marriage Act 1872”. Kane ka la pynlait ia ki shijur kiba la pyniathoh hapoh ka balang ba kim donkam shuh ba kin leit register biang hapoh ki Marriage Officers.
Na ka liang jong ki Balang kila pynpaw jingsngewnguh ia u Myntri ba dei peit ia ka tnad Parliamentary Affair u Martin M Danggo , ia u nongialam ka liang pyrshah u Dr Donkupar Roy, u Bah T Chyne, u Dr Jemino Mawthoh , kumjuh ia u bah HS Shylla MDC, ia u CEM ka KHADC u Bah Pynshngainlang Syiem kiba la ia don bynta lang ha kaba wanrah ia kane jingpynkylla.
Haba iadei bad kane kaba sah mynta ka long ba ka sorkar kan dang hap ban shna ia ki kyndon ba ha kano ka rukom ba ki nongialam balang , ki pastor ki phadar ki hap ban ai jingkhein sha ki Marriage Officer , ba ka sorkar kan buh ia ka pot la ki hap ban ai jingkhein katno jur kila pyniathoh ha ka lai bnai lane ha ka shi snem .
Kaei ba ka sorkar ka la leh ha u snem 2012 ban wanrah ia katei ka ain ka long ba kala khylliap ia ka ain jong ka sorkar pdeng kaba yn nym lah ban leh da ka sorkar jylla dei na kane ka daw ba ki sa mudui pyrshah ia ka MCRM Act 2012 hynrei namarba ka sorkar mynta u snem kala wanrah ia ka jingpynkylla bad ia kaei kaba ki balang ki kwah kala pynurlong, halor kane ka nongrim ki sa weng noh ia ka mukot duma .
