Shillong, Naiwieng 03: Ka seng HYC jong ka Mawlai unit mynta ka sngi kala leit ban ia kynduh ia ka myntri ba dei peit ia ka Higher bad Technical Education kong Roshan Warjri ban dawa na ka sorkar ban pynduh noh ia ka jingithuh ia kane ka Techno Global University kaba don ha phyllaw jong ka Mawli Polytechnic kaba kila shim wai ia ka jaka shna tiar jong ka kane ka jaka pule.
U Bah Donboklang Kharlyngdoh president jong ka HYC haba kren ha ki nongthoh khubor ha dien ba kila dep ban ia kynduh ia ka myntri, u la ong ba na ka liang jong ka sorkar kan sa shim khia ia kane ka kam ban peit bniah bad kumba ka long mynta kila dep ban bthah ba kane ka Univeristy ka dei ban mih noh ha kane ka jaka.
Ha kane ka jingiakren na ka liang jong ka seng kam kwah ban iohi ba kin bun sa tang ki university kiba khlem trei kam bad kane ka dei ka jingbakla jong ka sorkar bala shu leh kyrkieh ban pynlong ain ia ki ha u snem 2008.
Na ka liang jong ka seng kala dawa na ka myntri ba ka dei ban phah tohkit lane kane ka University ka dang pynrung khynnah ne em bad ka long ka jinglehrain ban ioh ba ki nongpyniaid ia kane ka skul bah kila shah kem halor ka jingdie thok ia ki certificate da ka jingtrei shitom jongki pulit ka Mawlai bad ki pulit na Patna. Kum ka seng ka don ka jingsngew syier ban ioh b aka University kaba tang shynrong kam paw sha ka pyrthei ba kane ka skul bah ka don ha kane ka nongbah Shillong.
Ha kane ka jingiakynduh ka seng kala ai por ar bnai ia ka sorkar ba ka dei ban pyndep ia ki jingtohkit ha kaba ia dei bad kane ka kam. Na ka liang jong ka myntri ruh kala kular ba kan phah ia ki briew jong ka tnad pule ban tohkit ia kane ka kam bad lada lap ba kam long shisha kumba la ai jingbit ka sorkar kan sa leh ia kaba don kam.
