Shillong, Rymphang 25: Ka kommittee kaba kyrpang kaba la thung da ka Executive Committee ban peit bniah ia ka “KHAD(Khasi Social Custom of Clan Administration) Bill, 2018 hapoh ka jingialam jong u bah Bindo M Lanong lem bad kiwei ki khot mynta ka sngi kila leit ban ai sha u CEM jong ka KHADC u bah Titosstarwell Chyne.
U ban Bindo M Lanong haba kren ha ki lat pathai khubor shuwa ban leit aiti ia ka Bill sha u CEM, la batai bniah ha kaba ia dei bad kane ka Bill, ka phang pdeng jong ka Bill ka long ba kum ka jaidbynriew khasi ka shim jait na ka kmie ym na u kpa.
Ha kane ka Bill na ka liang jong ka kommittee kala kren sha bala lada don mano mano ba shim jiad na u kpa ym dei shuh u ne ka khasi, kane ka dei ka phang pdeng jong kane ka Bill, la leh ia kane ban iada na ka jingshah tuh jaid ha kiwei pat ki jaidbynriew bad kum ki khasi dei ban shim jaid na ka kmie.
Haba ia dei bad ka jingspel dak la ai jingmut ba dei ban spel dak khasi ym ban ia pynwan da ka spel dak da ka ktien nongwei nongar, la ong ba la shah kyrpang ia kito ki rukom leh ha Bhoi ban shim jaid sha lade ia kaba la tip kum ka ringbia ban iada na ka jingduh jaid ka kur ka jaid.
Ha kane ka Bill kaba ka kommittee kala phah sha u CEM mynta ka sngi kala kren shai ruh ia ka jinglong ka kur ka jaid, la ai nuksa ba lada dei Syiem dei ban thoh ki dei na ka syiem aiu bad lada dei lyngdoh dei ban kren shai lyngdoh aiu yn nym shah shuh ban shu thoh syiem ne Lyngdoh namar katei ka rukom thoh ka dei ka kyrdan ba bat ha ki hima.
Ia kane ka Bill ban ithuh noh da ka ai ia ki kur ki jaid la pdiang ga ka iing dorbar jong ka KHADC ha u snem 2018 ha kaba u bah HS Shylla bam kwai ha dwar ublei u la wan rah ia kane ka Bill, hynrei u lat ka jylla u la pynphai noh sha KHADC halor ki jingylli kiba u la buh bad dei ha u snem 2020 la thaw ia kane ka kommittee ban bishar bniah.
Ki dkhot jong ka kommittee nalor jong u shongknor ki long u bah Teinwell Dkhar, Lamphrang Blah baroh arngut ki MDC, u bah Macmillan Byrsat MLA, nalor kitei la dang lang ruh kiwei kiwei ki dkhot ia kiba la thung na ka liang jong ki rangbuh kur kiba la ia don lang.
Ia kane ka Bill la pynbit pynbiang ha dien shisnem tam ba ka EC kala aiti sha ka kommittee ban peit biah, ka kommittee kala pan ia ki jingai jingmut na ki ba bun ha kaba la khot ruh ia ki ban ia mir jingmut ha dien ba la pyndep ia ki jingiamir jingmut ka kommittee kala ai ia ka Bill sha u CEM ba ka EC kan leh ia kaba don kam.
