Shillong,Jymmang 15: Ki paidbah nong shong shnong ka thain khappud bad kiwei kiwei de ki shnong hadien ka jingbym trei kam shuh jong ka Aircel na ka bynta ban ai ia ka jingshakri ia ki paidbah kala pynlong biang ban phai sha ka juk rim kaba mynshwa da kaba shu phah shithi ha ba don kano kano ka kam kyrkieh na ka bynta ban ia pyntip ia ki jingdonkam. Kane kadei ka jingeh ba khraw bha ba ki paidbah nongshong shnong ki ia kynduh ba man la ka sngi.
Hadien ka jingbym trei kam shuh jong u Aircel ki paidbah kiba shong ba sah ha ka thain khappud mynta kila wanphai biang sha ka juk rim kaba mynshwa da kaba phah shithi sha ki briew kiba ki donkam namar bym trei kam shuh ki mobile network.
Hooid ka long ka jingshisha ba ha ka thain Dangar bad ha ka shilynter jong ka thain khappud mynta ha ka por ba dang trei kam ka Aircel kiwei kiwei ki mobile network jong kiwei kiwei ki company ki ioh lang ha katei ka thain hynrei mar ia khang ka Aircel baroh ki khanglang lait noh tang ha Cell one, hynrei mynta wat ka cell one ha kiba bun ki jaka kam ioh shuh bad kane ka buh ia ki paidbah ha ka jingeh.
Na ka liang jong ki paidbah nong shong shnong kila ud la nam bha halor kane ka jingbym trei shuh jong ki mobile network hynrei kalong kaba don bok pat ia ki paidbah jong ka thain Dangar kaba hap hapoh jong ka Mawsynram Constituency kaba ioh ia u MLA uba sngewthuh shisha ia ka khia ka shong bad ka jingeh jong ki paidbah.
Katkum ka jingkren jong u Bah HM Shangpliang ha kawei ka prokram kaba la pynlong ha Dangar ha kine ki khyndiat sngi ba la dep u la pyntip ba na ka liang jong u, u la ioh ban ia kren bad ia phylliew jingmut bad u Bah DP Wahlang uba dei u Principal Secretary ka tnad Tele-communication halor kane ka jingeh jong ki paidbah ka thain.
“Nga la ioh ban ia kren bad u ophisar rangbah uba dei peit ia ka tnad Tele-communication bad pyntip ha u ba ngi donkam ia ka mobile network ha kane ka thain ka jong ngi bad kumta nga la ioh ban pynbeit bad I Bah Wahlang bad na ka liang jong u Bah Wahlang un sa ong ia ka BSNL ba kadei ban wan buh ia ki tower ha kane ka thain ka jong ngi” ong u Bah Shangpliang.
Shuh shuh u Bah Shangpliang u la pyntip ruh bal ah dep ruh ban jied ruh ia ka jaka bad ia ka jaka la ai sngewbha da u SDO jong ka tnad PWD hapoh jong ka phalor jong ka IB ha Dangar na ka bynta ban pynieng ia u Tower.
Haba buddien halor kane na ka liang jong u Bah Shangpliang u la iathuh ba na ka liang jong u Bah DP Wahlang u la dep ban ai jingthoh sha u Gneral Manager jong ka BSNL ban pynieng iaki tower hangthie hapoh ka Dangar bad kane ka jingbthah jong u Bah Wahlang kala iaid sha khmat.
Ha kaba iadei pat bad ka jingeh ba ki khun samla ki ia kynduh ha ka jingbym iohkam ioh jam na ka liang jong u Bah Shangpliang u la pynpaw ba u la dep ban ia kynduh bad u Deputy Commissioner (DC) ka East Khasi Hills bad la pynbeit ban sa pynlong ia kawei ka rally ban ai lad ia ki khun samla ba kin leit ia ki training ban ioh kam ioh jam.
Ia kane ka rally yn sa pynlong hapoh Dangar bad ia ka tarik ban pynlong ia ka yn sa pyntip, ki khun samla kiba la pass ia ka klass-8 haduh 12 ki bym leit skul kin sngewbha ban poi sha katei ka rally bad ngin sa wad ia ki samla kiba kwah leit security guard ki samla kiba kwah ban long mistery dieng ne cement, ki samla ba kwah shna light bad kumjuh ruh ban shna um bad kumjuh ruh ia ki kynthei kiba kwah suh jain bad kiba kwah ban buh ia ki beauty parlor.
“Ia kum kane baroh nga la pynbeit ba kan sa don ka rally hangne ha Dangar bad ynda phi la shah jied phin hap ban leit ia ka training kaba ar bnai bad ynda la dep ia ka training ngangta kin sa don ka jingthung kam ia phi ha ki jaka ba lait bad kane ka long ka jingpynkhreh ka jong nga na ka bynta ka jong phi” ong u Bah Shangpliang.
Ha kaba iadei bad ka jingeh jong ki paidbah solonsar ha kaba iadei bad ka jingkynshew pisa ne kumjuh ruh ban sei pisa na Bank u Bah Shangpliang u la ong ba hangne ha Dangar ngi donkam ban plie ia ka bank te namar kata ka daw nga la buh ha khmat ka sorkar bad kumjuh ruh ha u Chief Minister ban ngi donkam ia kawei ka bank hapoh Dangar.
“Ka file ban buh ia ka bank kala iaid sha khmat bad shen kin sa don ki briew kiba wan ban ia kynduh ia u Rangbah Shnong kumta nga kyrpad ia u Bah Slan Syiemiong uba dei u Rangbah Shnong ka shnong Dangar ban ai ia ka kti kamon ka kti ka diang na ka liang jong i ban pynjied ia ka jaka ne ka iing ba hangno kin dang shim waiba kin plie ia ka bank” ong u Bah Shangpliang bad bynrap “ia kane ngin dang iai buddien namar ba bin na ki, ki shem jynbha bha ha kaba iadei bad ka bank” u la ong.
