Shillong, November 23: Ka Khasi Disabilities Association ka seng jong ki briew kiba don ka jingduna ha ki dkhot met Central Body, ha ka 23th Naiwieng, 2016 ha ka jingialang jong ka Central Executive Committee (CEC) ka la shim ia ka rai ban pynlong ka jingiakhih da kaba shong kyllaiñ myngngor naduh ka por 10 baje mynstep haduh ka por 04 baje janmiet ha jaka pynieng kali hajan Addl. Secretariat kaba don marpyrshah bad ka ophis BSNL Shillong.
Kane ka jingiakhih jong ki kadei namar ka jingkuman ka sorkar ban pyntreikam ia ki mat jingdawa, ki jingeh, ki shkim khamtam ka iohkam iohjam kaba dei ka bhah jong ki briew kiba don ka jingduna ha ki dkhot met hapoh ka jylla, katkum ka aiñ the Persons with Disabilities (Equal Opportunities Protection of Right and Full Participation) Act, 1995.
Ka sorkar mynshem snem, kata ha ka 02nd Nohprah, 2015 ka la khot iakren ia ka seng KDA bad ka la kular ban pyntreikam ia ki mat jingdawa kaba ka seng ka la buh la bun shisnem mynta, hynrei kine ki jingkular ki khlem seisoh satia wat la kidei kiba don lypa ha ka PWD Act, 1995.
Kumta ka seng KDA ka iawer ia baroh ki briew kiba don ka jingduna ha ki dkhot met ban iapoi lang ha katei ka sngi kum ka dak ka jingiatylli lang ban pynsngew ha ka sorkar ia ki jingeh kiba ngi ia kynduh. Ka seng KDA kan rakhe ruh ia ka sngi ba kyrpang jong ki briew kiba don ka jingduna ha ki dkhot met kaba dei ha ka 03rd Nohprah World Disabled Day da kaba shong kyllaiñ myngngor mynta ka snem 2016.
