Shillong, Rymphang 02: Kum shibynta ka bynta kaba ar jong ka jingiakhih pyrshah ia ka National Institute of Open Schooling (NIOS) kaba dang iaid shait shait mynta halor ka jingpynslem bad leh bymsuidniew ban pynbeit ia ki jingbakla ha ka resol jong ka jingshah hikai pyntbit ha ka kam ban long nonghikai ka Diploma in Elementary Education (D.El.Ed) jong ki batch ba nyngkong (2013) , palat san spah ngut ki nonghikai hapoh East bad West Jaintia Hills kiba ialeh iatei ka exam kiba kynthup naduh ki nonghikai SSA, Govt, Adhoc , Deficit bad 4th teachers ki la wan ban iashim bynta ha ka Letter Campaign sha u Myntri Rangbahduh ka ri, Narendra Modi kaba la sdang naduh 30 tarik Kyllalyngkot bad kan bteng haduh 4 tarik Rymphang ba la pynlong da ka synjuk ki nonghikai skul SSA hapoh ka Jylla , ka Meghalaya SSA Schools Association (MSSASA) ha ka 2 tarik mynta u bnai ha sor Jowai.
U bah Aristotle C Rymbai President ka MSSASA Sengkmie, haba kren bad ki lad pathai khubor , u iathuh ba haduh mynta ka sngi kaba saw jong ka Letter Campaign kumba 1235 ngut ki nonghikai kila dep ban phah ia ki jingujor jong ki sha u Myntri Rangbahduh ka ri bad ruh ban kyrpad ia u ban tuklar halor ka jinglehbein jong ka NIOS ia ki nonghikai kiba ialeh ia ka D.El.Ed.
“Lashai ka sngi kane ka juk ka programe ngin sa pynlong ha Shillong hapoh Khasi National Durbar Hall , Mawkhar na bynta ki nonghikai (Trainees) kiba hap hapoh East Khasi Hills District, West Khasi Hills District, South West Khasi Hills , Ri Bhoi bad Garo Hills”.
Lah ban kdew ka Meghalaya SSA Schools Association (MSSASA) kala sdang ia ka jingiakhih pyrshah ia ka NIOS da ka jingshong kyllain mynngor kaba ar sngi kynthih mynha ka 24 bad 25 tarik Kyllalyngkot hakhmat ophis treikam ka NIOS kaba don ha Laitumkhrah Shillong ha kaba la wan ban iashim bynta kumba hynniew spah ngut ki nonghikai.
