Shillong, Iaiong, 06: Ka Jaiñtia Students Movement (JSM) Central Body ka la pan jingkyrshan na ki paidbah ban kyrshan ïa ka jingdawa Government College ha East Jaiñtia Hills District. La ong u Bah Leningstar Rymbai ha ka kyrwoh kaba la phah mynta ka sngi, president.
Ka JSM ka khot ka were ïa baroh ki paidbah nongshong shnong ka East Jaiñtia Hills District, kynthup ruh ïa ki Waheh Shnong, Secretary Shnong, long kmie long kpa, khamtam ki khun samla, ki seng bhalang bapher bapher, ki seng long kmie, ki seng Niam bapher bapher, ki seng samla shnong ban wan ïashim bynta lang ha ka jingïalang paidbah ka ban long ha ka 8 tarik, mynta u bnai ha ka por 9:30 baje ha madan ka skul Don Bosco Higher Secondary School, Khliehriat.
U nongialam kane ka sngi JSM u ong, “ka seng ka ïohi ba ka Kolej Sorkar ka donkam kyrkieh haduh katta katta hapoh ka District namar ki khun samla kiba beh ïa ka jingnang jingstad ban bteng ïa ki jingpule ba kham shalor ki don ha tmier ka jingeh bad bun na ki samla pule ka District ki la hap ban shu pep noh shiteng por na ka jingpule namar ka jingbym donlad ban bteng ïa ka jingpule shabar na ka district na ka daw ka jingbym kot bor ki kmie ki kpa ban kyrshan ïa ki khun ban bteng ïa ka jingpule ha ki Kolej ha ka Jylla ne wat shabar ka jylla.”
“Ha,oid, ngi don kawei ka Kolej Sorkar hapoh ka ri lum Jaiñtia kaba ngi tip kum ka Kiang Nyngbah Govt. College hynrei kane ka jaka pule kam lah shuh ban pdiang shibun ki khynnah pule namar ka jingkhapngaih ki kamra klass,” ong une u nongïalam ka Seng. U Bah Rymbai u la ong ba ki khun samla ki shu pep lehnoh ei ïa la ka jingpule namar ba kim ïoh lad ban leit sha kiwei pat ki Kolej, te ka jingkutlad ka pynsniew ïa ka jinglong jingim jong ki.”
Na ka liang jong ka JSM ka khot ka wer ia ki paidbah nongshong shnong jong ka East Jaintia Hills ban ia poi sha kane ka jingialang ban pynsngew sha ka sorkar bala don kam ban don ia ka college jong ka sorkar ha katei ka thain na ka bynta ka jingmyntoi jong ki briew katei ka thain ba kin ioh lad ban pule sha ki kyrdan kiba kham sha jrong.
