Shillong, Lber 03: Ka tnad ka koit ka khiah kan sdang ia ka jingai jingiada ia ki khynnah kiba hapoh ka ar snem da kaba sdang ban ai ia ka jingyndih dawai ia kaba la tip kum ka Indradhanush 4.0 bad kane kan sdang naduh ka 7/3/2022 bad ka jingai dawai kan long lai bynta.
Dr. C Khonglah haba kren ha ki lat pathai khubor ha Shillong Press Club, la ong ba ka jingdon kane ka khlam COVID-19 ha kine ki ar snem ym shym la lah ban pynlong ia kane ka jingaidawai ia ki khynnah kiba hapoh ka ar snem.
Ha dien ba kane ka jingshimtom kala duna na ka liang jong ka tnad ka koit ka khiah kan sdang biang ia kane ka jingai dawai khnang ba ki khynnah kin ioh ia ka jingkoit jingkhiah, la kyntu ia ki kmie ki kpa ba kin shim khia ia kane ka bynta na ka bynta ka jingbha ka jong ki khun jong ki.
Na ka liang jong ki doctor kila pynpaw ba ka jyllei bha ka jingduna snam ki long kmie ha Khasi Hills, ka daw ka long ba duna ki jingbam ba tei met bad ka jingshong kha khynnah bad ka jingbym bam ia ki jhur.
Ban iarap ia ki long kmie kiba armet ka don ka jignsam bam na ICDS bad ka jingai dawai snam hynrei kaba sngewsih ka long ba kim treh ban dih tista ia ki dawai bad kane kala wan ruh ia ki jingjia kiba sngewsih ha kaba 48 ngut ki long kmie ki khlad ha kane ka shisnem.
Na ka liang jong ki doctor kila pynpaw ia ki jong ki jingeh katkum ka jingshem jong ki ba don kynhun niam ki bym treh ban shim ia ki lad jingiada bad kane ka dei ka jingeh kaba ki doctor ki ia kynduh ha ki katto katne tylli ki bynta jong ka East Khasi Hills District.
Ha kane ka sngi kiba la don lang ha kane ka jingiakynduh bad ki lat pathai khubor ki logn Dr. L Kharmuthe MCH bad Dr. Iaineh L Mawphlang, la kyrpad ia ki kmie kpa ba kin shim khia ban ai jingiada ia ki khun da kaba shim ia ki lat jingiada ba ka sorkar ka ai sha ki paidbah.
