Shillong, Naiwieng 17: U myntri rangbah ka jylla u Dr Mukul Sangma u la ong ba ka cabinet mynta ka sngi kala pdiang ia ka rai ban pynioh light sha baroh ki shnong kiba don hapoh jong ka jylla Meghalaya, ban pynurlong ia kane ka sorkar jylla ka hap ban ia soi ia ka soskular hapdeng ka sorkar jylla, ka sorkar pdeng bad ka MeECL.
La ong ba haduh mynta ka jylla Meghalaya ka dang don haduh 345 tylli ki shnong kiba khlem pat ioh light, Kane kan wan n aka skhim jong ka sorkar pdeng ia kaba la tip kum ka “Deendayal Upadhyaya Gram Jyoti Yojana”. Ka jingbei pisa kan long 85pc kan ai ka sorkar pdeng bad 15pc kan sei ka sorkar jylla. Ka jinglut na ka bynta kane kan long haduh T.161.64 klur tyngka.
Kum kane ka juh hi ka skhim pat, hynrei kan long tang ia ki jaka sor ia kane ka skhim la tip kum ka “Integrated Project Development scheme” ha kane ka skhim ruh ka jingbei pisa kan long 85pc na ka sorkar pdeng bad 15pc na ka sorkar jylla.
Ki jaka sor kiba dei ban ioh ia kane ka skhim ha kane ka jylla ki long ka sor Shillong, Jowai, Mairang, Nongpoh, Nongstoin, Williamnager, Resubelpara, Tura bad Baghmara. Wat la ka light kala don ha kine ki jaka sor hynrei ki dang don ki iing kiba khlem pat ring light.
