Shillong, Lber 06: U Bah Francis G Kharshiing IPS, u shongknor jong ka “Central Recruitment Baord” jong ka tnad pulit la ong ba kila shim ia shibun ki lat ki lynti ban pynthikna ba jingpynrung ha ka tnad pulit kan long kaba khuid.
Kane ka jingleh kan long naduh ka sngi ba ki sdang ban pynmareh ha kaba yn ring dur ia ki shympriah kti ban pynthikna ba kannym don ka jingleh thok, ia ki kot thoh eksam kan long ka sien kaba nyngkong ba ki samla kin hap ban thoh da kaba buh karbon.
Kane ka rukom thoh kan don ia ka sla kaba nyngkong, kaba ar bad ka sla kaba lai, ia ka sla ba nyngkong bad bad ar yn bat hapoh ka tnad pulit ban korek bad ia kaba lai yn ai sha ki samla ba kin sngewthuh kaei kaba ki thoh, kane kan lait na ka jingshah kynnoh.
Ha ka por interbiew yn pyndon kam da ki komera ban rekord ia kaei kaba ki jubab, kane ruh ka long ban pynshisha ia ka jinglah jong ki samla wat kam, ha ka por ba ki mareh ruh kan don ka jingbuh ryntih ia ka jingkhein bad ia kane kin saw ah ruh ha ki jingpyntip ha jaka ba ki mareh.
Ban apply ia ka kam ha ka kyrdan Unarm Branch kum ki Sub Inspector kin long kiba la pass ia ka Graduate bad kilah ban jied ruh ia baroh ki 9 tylli ki kyrdan ha kane ka jinglaitkam, kin hap ban thep tang kawei ka aplikoshon na ka bynta baroh ki kyrdan.
Na ka bynta ki UB bad AB kiba lah ban ai apply ki klas XII bad ia baroh ki kam kiba hap ha ka kyrdan pule jong ki bad kine ruh kin thep tang kawei ka aplikoshon na ka bynta baroh ki kam kaba ki kwah ban thep bad kiwei ki dei kiba la pule klass IX shaneng.
Namar bym biang ki Internet ka tnad pulit kan sa khot ia ka jingialang jong baroh ki Superintendent ki pulit bad Commandant bad leh se bad ki ophis sorkar ban ia kren ban iarap lem ia ki samla pule ban thep kam. Kabai thep kam kan long T.150/- tyngka na ka bynta kawei ka kam.
Lada don kano kano ka jingeh ki pulit kila buh ia u number 6033164273 len kilah ban thoh da kaba phah sha kane ka email policetrg-meg@gov.in . Ha ka juh ka por la kyntu ia ki paidbah ban nym shah pynbeit ha ki riew shim kabu ban leit na ka shah kem.
