Mawkyrwat, Jylliew 14: Ka Synjuk ki Seng Samla Shnong, South West Khasi Hills District ha ka jingiasnohkti lang ban rakhe ia ka World Environment Week 2016 hapoh ka jingialam jong ka Kong R.Lyngdoh, DC, ban pynjyrngam ia ka Mei-Mariang da ki Programme thung Dieng ha ki Shnong bad ki Skul jong ka thain Mawkyrwat.
Mynta ka sngi ka SSSS, SWKHD ka la leit ban sam bad thung tynrai dieng ha Ngunraw Upper Primary bad Secondary School, ka Shnong kaba kham pajih na District Head Quarter ha kaba ka Surok ka long kaba sniew haduh katta katta. Watla ka jaka ka long kaba eh ha ki lynti ki syngkien hynrei ka long pat kaba sngewtynnad ban iashimbynta bad ki khynnah jong kane ka skul kiba la pynleit jingmut ia ki jingbatai shaphang ka Mariang bad ban shim ruh ia ka jingkular ban sumar ia ka Mariang ba la pynkhreh da ka District Administration.
Ha kane ka sngi la ioh ia ka jingkren na U Myntri ka Shnong, U Bah Bloswell Lyngkhoi. La ioh ruh ia ka jingbatai ban sumar sukher ia ka Mei-Mariang da u bah Kitborsing Lyngdoh, General Secretary SSSS, SWKHD. Shuwa ban sam mar uwei uwei u tynrai dieng sha ki khynnah skul bad ban shim ia ka jingkitkhlieh ban sumar iala u jong u dieng, la ioh ban pule lang ia ka jingkular ha ka jingialam U Bah Wallambok Syiemiong, Chairman SSSS, SWKHD.
Ka Synjuk ka la ban jur ruh ia Ki nonghikai bad ia ki khynnah Skul, ba kin sumar bha ia kine ki dieng ba la thied da ka Synjuk na ka tand khlaw jong ka sorkar ba kin heh kin san bad kin long ki nongmuna jong ki, ka skul bad ban ioh ki jingkyrkhu na u Blei haba ki khyllie biang ban pynim ia ka Mei-Mariang.
La pynwai ia kane ka Programme da ka jingkren aikhublei ia baroh kiba la iashimbynta shitrhem ha kane ka jingthung dieng da U Bah Harvester Khongthaw, Publicity Secretary, SSSS, SWKHD.
