Shillong, Risaw 01: U Bah D. Hynniewtap ba dei returning officer na ka bynta ka 13-Mawryngkeng (ST) Assembly Constituency la pyntip ba ka jingthep kyrteng ban ia khun ia ka ilekshon MLA shiteng samoi kan long ha kamra jong u bah R.Wahlang MCS ha ka hall jong ka DRDA kaba don ha DC ophis.
Ka por thep kyrteng kan sdang naduh ka por 11.00 baje mynstep haduh ka por 3.00 noh phai sngi, ka jingthep kyrteng kan sdang ha ka 8th Risaw 2021 bad ka jingbishar bniah ia ki kot ki sla kan long ha ka 11th Risaw 2021 ha ka hall jong ka DRDA. Ki kyrtong kiba kwah ban weng na ka jingiakhun ki lah ban leh ha lane shuwa ka 13th Risaw 2021, shuwa ka por 3.00 baje noh phai sngi.
U Returning ophisar jong ka 24-Mawphlang (ST) Assembly Constituency la pyntip ba ka jingthep ia ki kyrteng ban ia khun ia ka ilekshon MLA shiteng samoi kan long ha kamra 308-A jong u bah F.B Basan bad ka por thep kyrteng kan long naduh ka 8th Risaw 2021 por 11.00 baje mynstep haduh por 3.00 baje noh phai sngi.
Ka jingbishar bniah ia ki kot ki sla jong ki kyrtong kan long ha ka 11th Risaw 2021 ha kamra jong u returning ophisar, lada don kiba kwah ban weng noh na ka lynmpung jingiakhun ki lah ban weng ha lane shuwa ka 13th Risaw 2021 shuwa ka por 3.00 baje noh phai sngi.
Ka jingiathep vote ban jied ia ki MLA ba thymmai na kitei ki ar tylli konstiwensi kan long ha ka 30th Risaw 2021 naduh ka por 7.00 baje mynstep haduh ka por 4.00 baje jan miet.
