Shillong, Jylliew 07: Ka jingshah thombor jong ki Khasi kiba don ha Block I bad Block II, ha ki briew kiba dei na ka kynhun kieng atiar ka Karbi People Liberation Tiger (KPLT) na ka por sha ka por na ka liang jong ka Khasi Student Union, kala ia kynduh ia ki seng bhalang jong ka Karbi ha Nongpoh ban ia kren ia kane ka kam.
Ha kane ka jingiakynduh hapdeng ki nongialam seng bhalang na ka liang jong ka KSU bad ki nongialam seng bhalang na ka Karbi kaba kynthup ia ka Karbi Student Association (KSA), All Meghalaya Karbi Student Association (AMKSA), Karbi Unemployed Youth Association (KUYA) bad ka Karbi Anglong Peace Forum (KAPF).
U president jong ka KSU North Khasi Hills District u F Kharkamni haba kren ha u SP News Agency u la ong ba ka phang pdeng kaba ki iakren ha kane ka jingiakynduh ka long ba ki la ia shim ia ka rai ban kyntu ia katei ka seng lehnoh KLPT ba kam dei ban pyndik ia ki paidbah kiba don ha khappud.
Kane ka jingialang ka la shim ruh ia ka rai ban ong ia ka Karbi Aanglong Autonomous Council ba ka dei ban wengnoh ia ki khyrdop baroh na ki jaka kiba hap hapoh Block I bad Block II kiba dei hapoh jong ka jylla Meghalaya.
Ka jingiakren kaba la kham neh slem ka ha kaba ia dei bad ka jingdon jong ki Rangbah shnong, ba ha kawei ka shnong ki don ar ngut ki rangbah shnong, u wei u rangbah shnong dei u ba la jied da ki paidbah bad u wei pat ba la thung ka Council ha kaba ka siew da ka tulop.
Ha kane ka jingialang la shim ia ka rai ba kin ia leit lang sha kitei ki jaka ba don kane ka jingiatyngkhuh ban wad ia ka jingtip kaba bniah na ka jaka kaba jia bad kila dawa na ka sorkar Assam bad Meghalaya ba ki dei ban ai ka jingiada ia kine ki briew ban peit ba ki lehnoh kim dei ban pyndik ia ki paidbah.
U Bah Kharkamni u la ong ba um kwah ban iohi ba kane ka jingjia ha khappud Block I bad Block II kan jia kumba jia ha Garo Hills ha kaba ki paidbah kin jynjar bad kim sngewthuh shuh namar la jubor ka jingshah dawa pisa ha ki lehnoh.
Haba ia dei bad ka sorkar Meghalaya la ong ba kum ka seng ka la leit ban ia kynduh ar sien ka myntri kam poh iing hynrei haduh mynta kam shym don kano kano ka dak ka shim ba ka sorkar kan ai kita ki lad jingiada ia ki paidbah. Ka seng kan leit ban ia kynduh biang sa shisien bad lada ka sorkar kam sngap ka seng kan sa shim ia ka rai kaba tyngeh. (SP News)
