Shillong, Nailar 27: U Superintendent jong ki pulit ka East Khasi Hills District u Davis N.R Marak u la bethah ia baroh kiba buh ia ki iing basa kiba khlem pat register bad ki dei ban leh lehnoh bad ban pyntip sha ki pulit ia baroh ki nongwan sah hapoh iing basa jong ki bad ki dei ban pyndap ha ka “C” phom bad phah sha ka ophis “Superintendent jong ki Police – Cum-Foreigners Registration Officer, East Khasi Hills, Shillong.
Ha ka juh ka por na ka bynta jong kito baroh kiba la dep ban register ki dei ban phah ia ka jingpyntip sha ka ophis man ka por bad ka jingphah ka dei ban long hapoh 24 kynta naduh ba ki nongwan sah iing basa ki poi, ka long ruh kum juh ia baroh ki riew shimet, ki skul, ki hostel, ki college, ki Universities, ki balang bad ki Mosques, kane ka long ia baroh ki bar ri kiba wan sha ka jylla.
Baroh ki kompeni, ki seng bhalang, ki shnat trei kam jong ka sorkar lada ki wan ki dei ban don ia ka passport bad ka Bisa. Kiba wan sha ki jingialang ki dei ban wan da ka passport sorkar ym da ka passport kum ki nongwan jngohkai pyrthei. Ia kiba wan ha ka dur jong ki nongwan jngohkai pyrthei kin nym lah ban ia shim bynta ha ki jingialang ne shondur lane ba kin ia shim bynta ki kam niam.
Baroh ki kynhun kumba la dep ban kdew ki dei ban pyntip ia ka jingwan jong ki bar Ri bad la bethah ia baroh ba kin burom ia kane ka jingbethah, lada don kiba leh pyrshah yn shim ia ki katkum ki kyndon jong ka Foreigners Act, 1946.
