Shillong, Naitung 18: ka jingrakhe ia ka jingdap 179 snem ka sngi khlad u Tirot Sing Syiemlieh Syiem Hima Nongkhlaw hapoh ka Shnong nongkhlaw por 12.30 baje mynsngi.
La pyniaid ia ka jingialang da u Paiem Phrester Manik Syiemlieh, Syiem Hima Nongkhlaw
La ioh ka jingduwai na u Rev (Pastor) SL Mawblei, Chairman Celebration Committee)
la ioh ka jingkren na ka kur syiemlieh,
la ioh jingkren ruh na uwei na ki Sordar na ka Synjuk ki Sordar & Rangbah ka thain Nongkhlaw
ka jingkren na u Bah John F Kharshiing, Co-Chairman, Meghalaya State Planning Board, bad Chairman, Ka Dorbar Ki Khlieh Nongsynshar, uba la ong ba kawei na ki jingthmu ban kynmaw ia une u riewkhraw ka long namar um shym la pynjah burom ia la ka kur Syiemlieh, u la long uba ieng skhem ban bat ia ka burom jong ka iit ka Hima bad khamtam ban ieng ha ka nongrim jong ka jinglaitluid. Kum shi bynta ban kynmaw burom ia utei u riewkhraw (National Freedom Fighter) u la ai jingmut ba ka Sorkar Jylla kan pynlong ia ka jingrakhe ia kane ka sngi la dei ban pynlong ki program bapher bapher ha ki Nongbah jong ka Ri India khamtam ha ki ‘Meghalaya House – Delhi, Kolkata, Guwahati, Mumbai, Vellore bad ha kiwei kiwei ki jaka ba don ba sah ki Khasi khnang ba ka pyrthei kan tip ia ka jingshlur jong une u riewkhraw jong ngi.
U la kyntu ruh ia u Bah KP Pangniang, MLA & MDC, EM -ic Elaka KHADC, ba un thaw ki scheme bad ki lad lyngba ka District Council, khnang ba baroh ki 53 tylli ki Hima/ Elaka kin rakhe ia katei ka sngi. U la kyntu ia baroh ki kur ba ki dei ban buh ia ka thong ban sei ia ka khana samari jong ki 3367 tylli ki jaid khasi. u la kyntu ia ki nongsynshar shnong ban long kiba smat ban pule ia ki ain ki rule kiba mih na ka por sha ka por, na ki bor Sorkar India bor Sorkar Jylla bad kumjuh ruh ia ki ain kiba mih na ki bor KHADC. u la ong mynta ngi ia leh thma man ka sngi bad ki ain kiba bun sien ki ktah ia ki hok jong ka jaidbynriew.
La ioh jingkren na u Bah Brol Nongsiej, MLA & MDC, uba la ai khublei ia ki paidbah ka hima nongkhlaw, ha kane ka sngi leh burom ia utei u riewkhraw, u la ong ba ngi donkam ban ieng joit ban ialeh ia kino kino ki ain kiba wan ban iuh roit ia ka hok long trai halor ka khyndew ka shiap, ki khlaw ki btap bad ki marpoh khyndew.
la ioh jingkren na u Bah KP Pangniang, MLA & MDC, EM -i/c Elaka KHADC, uba la ong ba ka long kaba donkam ia baroh ki Dorbar Shnong, Raid haduh Hima ba ki dei ban lum dorbar tikna ym ban synshar ha ka jingsyngew jong uwei u ar hynrei ban lum ia ki Dorbar Hima kum shibynta ban burom ban buddien ia ki nuksa jong u Tirot Sing Syiemlieh. u la ong ba ki don katto katne ki paidbah kiba la ud ia ka jingbymlong Dorbar tikna ha ki katto katne tylli ki Shnong, Raid, bad Hima, bad u ong ba ki bor KHADC ki dang khmih bniah ia kine ki Hima /Elaka ba u la wer ia ki nongsynshar ba kin wanrah ia ka jingsynshar kaba shai kaba ailad ia u khun u hajar ba kin ioh ban pynsngew ia ki jingeh kiba ki paidbah ki ia shem na ka por sha ka por. u la ong ba ki bor KHADC kin ai ka jingiatreilang bad ki Dorbar naduh shnong, raid haduh Hima ha kano kano ka bynta.
U la ong ba ka jaidbynriew ka la shah shet ar sien kaba nyngkong ka dei haba ki phareng kim shym bat ia ka jingiateh hapdeng u David Scott bad u Syiem Nongkhlaw u Tirot Sing ha kaba iadei bad ki kam surok bad kaba ar ha kane ka pateng kaba mynta ka long haba ka Sorkar India kam shym pynrung bad pynpaw ia ki kyndon jong ka Instrument of Accession and Annexed Agreement hapoh ka Constitution ka Ri India.
u Bah Kennedy C Khyriem, MLA, Parliamentary Secretary, i/c Tourism, Art & Culture, etc., u la kyntu ia ki paidbah ba kin weng ia ka jingmutdur sniew lada ki kwah ban ioh ka jinglaitluid bad ban lait na ka jingshah teh mraw ha kane ka juk kaba mynta. U la pyntip ba ka Sorkar Jylla ka don ka jingthmu ban buh ia ka Indigenous Knowledge and Cultural Center hapoh Hima Nongkhlaw bad u la kyrpad ia ki bor Shnong bad Hima ba kin pynkloi ban wanrah ia ki kot ki sla khnang ban ioh pynkhreh ia ka DPR. U la kyrshan ia ka jingong ba ha kane ka sngi rakhe la dei ban rah ia ka nam jong u Syiem Tirot sha kylleng ka Ri Khasi bad kumjuh sha bar Ri. U la ong ba ka thain Nongkhlaw ka lah ban kylla ka jaka jngoh kai lada ki bor pyniaid shnong bad hima ha ryngkat ki paidbah kane ka thain ki ai ka jingiatreilang bad ka Sorkar jylla.
La ioh jingkren ai khublei na u paiem phrester manik syiemlieh, syiem Hima Nongkhlaw uba la ai khublei ia baroh kiba la wan bad kiba la pyndonburom ia kane ka sngi.(SP News)
