Shillong, Jylliew 03; Ka seng jong ki nonghikai ia kiba la tip kum ka All Meghalaya Adhoc Secondary School Teachers’ Association (AMASSTA) kala ia kynduh ia u myntri rangbah ka jylla u Dr Mukul Sangma ban ia kren halor ki jingeh kaba ki iakynduh kum ki nonghikai ha kane ka jylla.
Ha kane ka jingiakynduh na ka liang jong ki nonghikai kila buh ia ki jingeh ha khmat jong u myntri rangbah ka jylla bad na pdeng kine ki long ba ka jylla ka don 434 tylli ki adhock secondary skul bad ki nonghikai baroh ki don 2353 ngut haka jylla baroh kawei kiba hikai ha kum kine ki skul.
Haba ia dei bad ka jingsiew iaka tulop jong ki nonghikai kila kdew ba ka jingsiew ka long, T.10000 tyngka ia ki nonghikai, T.3500 tyngka ia u ba hikai Hindi bad T.11000 tyngka ia kiba hikai saian, na ka liang jong ki nonghikai ki ong ba kane ka jingsiew kalong kaba duna bad ka eh ia ki ban pyndap ia ka iing ka sem.
Ha kane ka jingiakren kila pynpaw ba kila ioh ia ka jingtip ba na ka liang jong ka tand pule puthi kila dep ai jingmut sha ka sorkar ban pynkiew noh 100 percnet ia ka tulop jong ki nonghikai bad ban pynkylla noh ia kine ki adhock school sha ka deficit.
Ha kane ka jingiakynduh na ka liang jong u myntri rangbah ka jylla u la shah skhor ia ka jingeh jong ki nonghikai bad ha kane ka jingiakren na ka liang jong u myntri rangbah u ong ba ka sorkar kan sa peit ia kaba kaba ka lah ban eh na ka bynta ka jingbha jong ki nonghikai.
