Shillong, Jylliew 13: U Chief Electoral Officer jong ka tnad Election mynta ka sngi u la khot ia ka jingialang jong baroh ki seng sain pyrthei ha kane ka jylla Meghalaya bad na ka liang jong ki seng sain pyrthei kila ia poi lait noh ka seng Congress.
Haba kren ha ki nongthoh khubor ha dien ka jingialang, u Bah F Kharkongor Chief Electoral Officer ba dei peit ia ka tnad Election ha ka jylla u la ong ba ka jingiakren ha kane ka sngi ka long ban kyntu ia baroh kis eng sain pyrthei ban peit bad ban ia rap lem ban pynrung kyrteng ia ki samla kiba la kynjoh 18 snem haduh 21 ba kin ioh rung ha ka Electroral roll.
Katkum ka jingkhien kaba ka ophis kala ioh ka long ba ki don palat ki samla kiba la dap 18 snem haduh 21 snem kiba khlem pat don kyrteng ha ka electoral roll bad kiba bun eh dei hapoh East Khasi Hills District bad ka Nongkrem Constituency ka don palat ia ka 15000 ngut ki samla kiba khlem pat don kyrteng ha ka electoral roll.
La bethah ia u DC jong ka East Khasi Hills ba u dei ban jurip kyrpang ia kane ban tip ia ka daw bad ia ka kaiphot dei ban phah sha ka ophis jong u CEO. La ong ba ka thung mynta ka long ha ki ar bynta ia ki samla pule bad ia kiba khlem pule, ka ophis ka kwah ia ka jingiatreilang jong ki seng sain pyrthei.
La bethah ruh ia baroh ki Deputy Commissioner jong baroh ki District ba ki dei ban leit sha baroh ki skul ban pynrung kyrteng ia ki samla kiba khlem pat don kyrteng bad kan long ruh kum juh ha ki shnong na ka bynta kito kiba trei ha la ki jong ki kam ki kam jong ki. La ong u Bah F Kharkongor.
