Shillong, May 30: Ka FKJGP Upper Shillong Circle hadien ba la ioh ka jingujor mynta ka katto katne por na ki Paidbah Nong Shong Shnong jong ka Thain Mylliem – Upper Shillong halor ka jing sdang ban jyllei ki Bar Jylla kiba ym ithuh ithaw satia kaba la buh ruh ia ka jingma ia ka leit ka wan jong ki Paidbah Nong Shong Shnong jong ka Thain, Ki Dkhot jong ka FKJGP Upper Shillong Circle hapoh ka jingialam jong u Samla Kitboklang Nongphlang, FKJGP President Upper Shillong Circle ha ryngkat ka jing ia donlang ryngkat ruh ki Enforcement jong ka Khasi Autonomous District Council mynta ka sngi 29th May 2017 ki la hiar kyndit kyndit ban pynlong ka jingkhynra ia kitei ki Bar Jylla ha ki Lai Tylli ki jaka kiba don ha ka Shnong Mawsawa, Mylliem bad kumjuh ruh ha ki bynta jong ka Shnong Khatwei Mer, Mylliem.
Ha katei ka jingleit khynra jong ka Seng la ioh ban pynher Krad da ki phew Ngut ki Mynder ha kaba kiba bun na ki ki dei ki Khar Muslim, kiba ym don satia ia ki Kot ki Sla kiba biang kynthup ruh ia ka Labour License bad kumjuh ruh ia ka Work Permit. Ia Kitei ki bar Jylla la wan ialam sha ka Thain Mylliem da ki Company, Business man bad Contractor bapher bapher kynthup ia kawei ka center of learning knowledge and services (CLOKS) ia kaba la kam ruh ba katei ka Centre kadei kaba don ka jingiateh Lok bad ka Tnad Veterinary Department lem bad ka Science & Technology ia kaba la pyntrei da uwei u Contractor Khasi, Kawei ka jaka ri masi, ka jaka ri dohkha ha Mawsawa kynthup ruh ia kawei ka Petrol Pump bad ka Dhaba kaba don ha Khadwei Mer, Mylliem.
Namar ka jing bym don ia ki kot ki sla kiba biang na ka liang jong ka FKJGP Upper Shillong Circle kala hukum ia baroh kitei ki bar jylla ba kidei ban mih noh mardor na kitei ki jaka tad haduh ba kin da lah ban pynbiang lut ia ki jing donkam baroh na ka Khasi Autonomous District Council lem bad ka Labour Department jong ka Sorkar Jylla. Katei ka jingleit Khynra jong ka Seng ka long kaba Seisoh namar la ioh ka jingiatreilang na baroh ki Trai lem bad ki Contractor kiba la shimkhia ban ialam noh mardor ia kitei ki Nongbylla.
Haba kren sha ki Lad Pathai Khubor na ka liang jong u Samla Kitboklang Nongphlang, FKJGP President Upper Shillong Circle u la pynpaw ia ka jing bynniaw bad ka jing sngewkhia kaba jur halor ka jing shim sting jong ki Nong Synshar Shnong ia kane ka bynta da kaba ong ba katba ki Seng Bhalang ki dang iakhih ban dawa na ka Sorkar ia ki Ain kiba khlain ban teh Lakam ia ka jing wanrung Kyrthep jong ki Mynder hynrei sngewsih ban iohi ba kum kine kiei kiei baroh pat ki Plie Rynghang ia ka Jingkhang. Ha kajuh ka por na ka liang jong utei u Samla Nongialam u la Byrthen bad Maham tyngeh ia ki baroh Contractors, Company, Businessman kynthup ruh ia ki Nongsynshar Shnong kiba ailad ia ki Bar Jylla nangne shakhmat ba kin shuh thied ha ka Thain Upper Shillong-Mylliem bad ha kajuh ka por u la kyntu ruh ia ki ba ki dei ban iatreilang bad ka Seng na ka bynta jong ka bha ka miat jong ka Jaitbynriew.
Ha kawei pat ka liang u Samla Kitboklang Nongphlang, FKJGP President Upper Shillong Circle u la pynpaw ia ka jingbitar halor ka jing shim sting jong u Labour Inspector jong ka Sorkar Jylla uba dei khmih ia kane ka Thain, utei u Samla Nongialam u la ong ba ha ka jingshisha na ka liang jong ka Seng kala dep ai ia ka jingpyntip ha ka por kaba biang, Na ka liang jong ka Seng hadien ba la ioh jingtip ba u Labour Inspector uba dei khmih ia ka Mylliem Block um ioh satia ia ka Kamra ban Shong ha Block Office kaba don ha 5mer, Upper Shillong ka Seng ka la leit iakynduh mar mar ia u BDO Mylliem Block ban iakren halor katei ka kam, ha kaba na ka liang jong u BDO pat u la pynpaw ba la dep ban allot ia kawei karma na ka bynta jong u Labour Inspector.
Ha kaba iadei bad kane ka bynta na ka liang jong U Samla Kitboklang Nongphlang u la kyntu ia ka Labour Department ba kadei ban shimkhia nangne shakhmat khnang ba kiei kiei baroh kin long kiba iaid beit iaid ryntih, ha kajuh ka por na ka liang jong utei u Samla Nongialam u la ong ba ka Seng kan sa pynlong ka Jingkynra kaba kyndit sha kiwei pat ki bynta jong ka Thain ia kaba yn sa leh Kyllum Lang salonsar ha kine ki khyndiat sngi ki ban wan da kaba bynrap ruh ba kumba ngi la ioh ia ka jing iatreilang mynta ka Sngi, kum ka Seng Ngi khmih lynti ba ngin nang ioh shuh shuh ia ka jingiatreilang nangne shakhmat namar kane kadei ka mat kaba kongsan tam kaba ktah ia ka iap ka im jong ka Jaitbynriew.
