Shillong, Nailur 05: Ka Joint Action Committee of All Teachers’ Association of Meghalaya (JACATAM) mynta ka sngi kala shim ia ka rai kaba tyngeh ban pynbor ia ka sorkar ba ka dei ban ai noh ia ki jingdawa jong ki da kaba khot ia ka jingsangeh hikai kaba ar taiew lynter kaban sdang naduh ka 22 tarik mynta u bnai haduh ka saw tarik jong u Nailar u ban wan, ia kane la pynbna da u Chairman ka seng u bah AD Nongsiang ha Madan Iewrynhep Laitumkhrah.
Kane ka rai kaba ki la shim ka long namar ka jingleh bymsuidniew jong ka sorkar ia ka jingdawa ka jong ki ban shimti noh ka sorkar ia ki nonghikai ia kaba la tip kum ka “provincialise” ha kane ka juh ka sngi kila shim ka rai ruh ba ki lah ban pynthud ia ka sngi rakhe sngi burom nonghikai lada ka sorkar kam khot ia ka jingiakren shuwa ka 4 tarik Nailur.
Ha kane ka sngi la kyntu ruh ia baroh ki nonghikai ba kim dei ban leit sha ki skul ha kine ki 14 sngi ba ki pynlong ia ka jingiakhih ka jong ki bad ia kane la ai ia ka jingmynjur jong ki nonghikai kiba la ia poi sha kane ka sngi da kaba ia pyrta “HOOID”.
La ong ruh ha kane ka jingialang paidbah jong ka JACATAM na ka liang jong u myntri ba dei peit ia ka pule puthi jong ka jylla u Dr R C Laloo, ha ka jingiakren bad ki nongialam jong ka seng ka paw shai ba kam don ka jingburom ia ki nonghikai.
La ong ba lada ka sorkar kam lah ban khot ia kren ia ki nonghikai na ka liang jong ka seng kan dang pynjur shuh shuh ia ki jingiakhih ka jong ki bad kane kam dei ba ki kwah hynrei ka jingkynnoh ka leit sha ka sorkar lada ki nonghikai ki ia khih.
La ong ba u myntri jong ka sorkar jylla ba dei peit ia ka pule puthi u dei ban shim ia ka jingkitkhlieh ia ka kam ym dei ban kyntait hynrei mynta u la khynniat sha ki managing committee bad u myntri u dei ban shim ia ka jingkitkhlieh ban pynbeit ia kane ka jingeh jong ki nonghikai.
La ong ruh ba lada ka sorkar ka ong ba kam don pisa ban ai ia kane ka jingdawa jong ki nonghikai ka sorkar na ei ka ioh pisa ban pynlong ia ki tamsa la ong u bah Nongsiang. U bah P. Wanlirpih Action Committee, Chairman JACATAM, u la ong ba u pan map na u myntri rangbah ka jylla na kine ki jingkynthoh ha kaba ia dei bad ki jingrwai bad jingshad jong u, hynrei wat rwai ia ka jingrwai kaba u sngew tynnad hynrei u dei ban rwai ruh ia kaei kaba ki paidbah ka jylla ki don kam.
