Shillong, Jymmang 13: Ki paidbah jong ka thain Nongjri kila pynpaw ia ka jingsngewbitar ia ka jingleh jong ka BSNL ha kaba ia dei bad ka jingshna ia u Tower Mobile hapoh katei ka shnong namar ba kam shym la lah ban pyndep mynta la lai snem lynter.
U Bah Nasar Marwein, u wei na ki rangbah shnong katei ka thain, u la ong ba ka long kaei kaei kaba sngewsih ban iohi ba ka BSNL kala leit ban shna ia u tower mobile ha kane ka shnong lai snem mynshuwa hynrei haduh mynta kam pat lah ban pyndep ia une u tower.
Ka thain Nongjri baroh kawei ka don kam ia u tower mobile namar kumba ka long mynta ka net work mobile ha kane ka jaka ka wan na kiwei ki bynta kum ka thain Maweit bad ki thain Mawkyrwat bad ka net work kam biang ki don tang ki jaka jaka ba lah ban ioh net work.
U Bah Marwein u la ong ba ka thain Nongjri kala don kam kyrkieh ban don ia u tower mobile khang ba kan ioh bha ka net work, la ong ba bun sien ha ba don kano kano ka jingjia ban pyntip sha ki bor jong ka ain ruh ka shitom bha hap ban leit ia thuh sha Nonghyllam, hynrei lada ka biang ka net work ka long ba lah ban pyntip wa tang da ka phone.
La ong ba na ka liang jong ki paidbah ki kwah ba ka BSNL ka dei ban pyndep noh ia u tower ba la sah teng mynta la lai snem la da ka BSNL kam lah ban pyndep kloi na ka liang ki paidbah ka tei ka thain ki hap ban ujor sha ki bor ba halor.
