Shillong, Nailar 10: Ka seng JSU haduh mynta myne ka dang bteng beit ban iaid da ka jingiakhih bad ka jingiakhih kan dei beit da ka kam ban khynra naphang iaki bar jylla ki bym biang ki kot ki sla kiba rung beaiñ bad sah trei hapoh ka jylla .
Ka seng JSU na Khliehriat Circle bad ka Southern Border Zone ryngkat ka jingsynran lang ki nongialam ka JSU sengkmie ki lah bteng ban iai khynra bar jylla ha kane ka sngi bad ki dkhot ka seng ki lah hiar sha Ratacherra ha khyrdop ban rung bad mih shapoh ka jylla.
Ka seng ha kane ka sngi hapoh ka jingialam u samla Livingson Dkhar Sama President Khliehriat Circle bad u Presisent ka South Border Zone u samla Ajoymenson Lyngdoh ryngkat bad ki dkhot ka seng ki lah hiar ban leit peit iaka kane ka khyrdop ban rung mih shapoh ka jylla lyngba ka Jaintia Hills.
Ha ka jingshem ka seng ki lap ba kane ka khyrdop kam pat biang paka bad ka sorkar ka lah pynlong ruh iakane kane ka jaka kum ka COVOD 19- Check point ha katei ka jaka.
Na ka liang ka seng ka pynrem jur bad sngew bitar iakane ka jingleh ka sorkar bad ka seng ka pynrem jur iaka sorkar jylla ha kaba ka lah buh teng ban pyndep pura iaka khyrdop ban peit khmih iaka jingrung jingmih ki bar jylla shapoh ka jylla Meghalaya.
Ka seng ka lah lap bun na ki bar jylla kiba rung na kane ka jaka ki ai daw beit ba ki leit donkam sha ki kharkhana cement bad bun na ki kim don satia ki kot ki sla kiba biang ban rung shapoh ka jylla ban leit trei leit ktah sha kine ki kharkhana cement kiba don hapoh ka ri lum Jaintia.
Ka seng kan nang iai bteng ban khynra iaki bar jylla kiba rung beaiñ shapoh ka jylla Meghalya khlem da pynbiang iaki kot ki sla shuwa ba kin wan trei wan ktah shapoh ka jylla bad ka seng ka lah beh noh iakine ki bar jylla ba kin leit phai biang sha ka jaka kaba ki wan .
Ka seng ka phah ruh iaka kyrwoh sha baroh ki paid ka bri u hynñiewtrep ba ngi dei ban long ki nongpeit pyrman ha kum kane ka por namar ka jingwan buhai shnong u bar jylla ka lah jur bha bad ka seng ka kyrpad ruh iaka JHADC ba kim dei shuh nangne sha khmat ban shu ai kot ai sla ia ki bar jylla khlem ka daw kaba biang.
