Shillong, Nailar 26: Ka jingpyntrei ia ka building Meghalalya Information Technical Society (MITS) ka la iaid sha khmat bad khmih lynti ba yn lah ban pyndep noh ia ka ha u bnai Lber, 2021 khnang ba kan long ka jingmyntoi ia ki samla ka Jylla.
Ia kane la pyntip da u Bah Hamletson Dohling, Myntri ka tnad Information and Technology ka Sorkar Jylla hadien ka jingwan jurip ia ka ha ka Sngi Balang ha ryngkat ki ophisar ka tnad IT, ki bor na ka Company ba pyntrei ia kane ka project bad kiwei.
Ia kane ka building, ha ka jaka kaba 20 acre tam ha Umsawli, la mang tyngka 35 klur ban pyndep ia ka bad pyntrei da ka Badri Rai & Co. Construction Ltd. La sdang ban pyntrei ia ka ha u bnai Nohprah, 2018. La pynwandur ia kane ka building da u Bah J Cajee
“Kum u Myntri nga kwah ba kan don ka jingpynsted ban trei ia kane ka projek bad nga sngew kmen ba ki ophisar ka tnad lem na ka liang ka Construction Company ki la pyntip ba ka jingpyntrei ka la poi sha ka 70%”, la ong u Bah Hamletson Dohling.
“Nga ïohi ia ka jingiaid ka kam bad ka long kaba sngewtynnad bad lada ba ym don ka khlam COVID-19 lehse ka kam ka la sah sa tang shi bnai ar bnai ban pyndep. Nga la ïohi da la ki khmat ba ka jingpyntrei ka long kaba iaid sha khmat”, u la ong.
“Ynda la dep ka projek kan ai kam ia ki khynnah samla jong ngi bad nga tip ba ki bun ki samla pule jong ngi kiba la kot bha ka kyrdan pule. Kiba la wan phai na shabar Jylla na ka daw ka khlam COVID-19 ruh kin lah ban pyrshang ban ïoh kam ioh jam noh ha ka Jylla”, u la ong.
“Ki la bun ki aplikeshon watla ka building ym pat dep hynrei nga kwah ban ong ba haduh palat 1000 ngut ki samla kiba la pyndep ia ka jingpule kin lah ban ïoh kam ïoh jam”, u la ong.
Na ka liang u Anuj Bansal, Director ka Badri Rai & Co Construction Company u la iathuh ba ha kaba sdang jong ka jingtrei ka la don ka jingthut hynrei mynta ka la iaid sha khmat. “Ngi sngewtynnad ia ka jingai jingïatreilang ka tnad bad ngin pyndep kloi ia ka kam”, u la ong.
U la ong ia mynta sa tang katto katne ki kam ban pyndep bad donkam ia ki nongtrei kiba la tbit (Skilled Labour) na bar Jylla. “Ngin pyrshang ban wanlam ia ki bad ngin dang phah jingthoh sha ka ophis Deputy Commissioner bad sha ka tnad ban ïoh wanlam ia ki nongtrei”, u la ong.
